Mbi 38.4 milionë amerikanë jetojnë me diabet, kryesisht diabet të tipit 2, dhe normat e tij pritet të dyfishohen deri në vitin 2050. Shkaku i saktë mbetet i panjohur, por faktorë si gjenetika, obeziteti dhe mungesa e aktivitetit fizik kontribuojnë në zhvillimin e sëmundjes.
Një studim i ri i udhëhequr nga Universiteti i Harvardit dhe i botuar në “The Lancet Diabetes and Endocrinology”, sugjeron se konsumimi i mishit të kuq, si i përpunuar ashtu edhe i papërpunuar, mund të rrisë rrezikun për diabet të tipit 2, shkruan burimi Health News transmeton Gazeta Shneta.
Studiuesit përdorën të dhëna nga projekti global “InterConnect”, duke analizuar 31 studime nga 20 vende, me gati dy milionë pjesëmarrës.
Rezultatet treguan se konsumimi i 50 gram mish të përpunuar në ditë – ekuivalent me dy feta proshutë – lidhej me një rrezik 15% më të lartë për zhvillimin e diabetit në dhjetë vitet e ardhshme.
Ndërkohë, 100 gram mish të kuq të papërpunuar në ditë – një biftek i vogël – lidhej me një rrezik 10% më të lartë. Mishi i përpunuar përfshin produktet e konservuara me tym, kripë ose konservues kimikë.
Profesoreshë Nita Forouhi nga Universiteti i Kembrixhit theksoi se ky studim ofron provat më gjithëpërfshirëse deri më tani për lidhjen midis konsumit të mishit dhe rrezikut të diabetit të tipit 2, duke mbështetur rekomandimet për kufizimin e tij.
Studiuesit gjithashtu sugjerojnë se zëvendësimi i 50 g mish të përpunuar me 100 g mish të papërpunuar mund të reduktojë rrezikun për 7%.
Megjithatë, autorët nënvizojnë se studimi tregon një lidhje dhe nuk provon shkakësinë.
Disa mekanizma të mundshëm përfshijnë përkeqësimin e ndjeshmërisë ndaj insulinës, funksionin e qelizave beta të pankreasit, si dhe efektet e proteinave shtazore dhe aditivëve si nitrati dhe nitriti, të cilët mund të formojnë komponime N-nitrozo, të lidhura me rritjen e rrezikut për diabet. /Gazeta Shneta/