Një studim i gjerë i realizuar në Shtetet e Bashkuara të Amerikës ka konkluduar se uji i fluorizuar nuk ndikon në peshën e foshnjave në lindje, duke hedhur poshtë pretendimet se fluoridi në ujin e pijshëm mund të dëmtojë zhvillimin fetal.
Sipas studiuesve, nuk është gjetur asnjë lidhje domethënëse mes fluorizimit të ujit në nivel komunitar dhe peshës së ulët të foshnjave në lindje. Ndryshimet e vërejtura në peshë kanë qenë minimale dhe statistikisht të parëndësishme.
“Gjetjet tona ofrojnë siguri për sigurinë e fluorizimit të ujit gjatë shtatzënisë,” kanë deklaruar autorët e studimit.
Studimi ka analizuar të dhëna nga më shumë se 11 milionë lindje, të regjistruara në 67 qarqe amerikane gjatë një periudhe 21-vjeçare, nga viti 1968 deri më 1988, kohë kur fluorizimi i ujit u shtri gradualisht në shumicën e komuniteteve në SHBA, shkruan MedicalXpress transmeton Gazeta Shneta.
Në fund të vitit 1988, rreth 90 për qind e qarqeve amerikane kishin zbatuar fluorizimin e ujit, duke përfshirë afërsisht gjysmën e popullsisë së vendit.
Autorët theksojnë se pesha në lindje është një tregues i rëndësishëm i shëndetit të foshnjës dhe lidhet me zhvillimin e mëvonshëm shëndetësor, por në këtë rast nuk është vërejtur ndonjë ndikim negativ nga ekspozimi ndaj fluoridit përmes ujit të pijshëm.
Studimi vjen në një kohë kur Agjencia Amerikane për Mbrojtjen e Mjedisit (EPA) po rishikon të dhënat shkencore mbi efektet e fluoridit, pas raporteve që lidhin nivele shumë më të larta se ato të rekomanduara me ndikime në inteligjencën e fëmijëve.