Një studim i ri sugjeron se foshnjat që ushqehen me gji gjatë gjashtë muajve të parë të jetës kanë më pak gjasa të kenë gjumë të shkurtër në moshën njëvjeçare, krahasuar me ato që ushqehen vetëm me formulë qumështi. Studiuesit japonezë sugjerojnë se një nga arsyet mund të jetë fakti se qumështi i gjirit përshtatet vazhdimisht me nevojat në ndryshim të foshnjës, ndërsa përbërja e formulës mbetet kryesisht e pandryshuar.
Studimi analizoi të dhënat e 82.918 çifteve nënë–foshnjë nga studimi kombëtar japonez. Studiuesit krahasuan katër grupe foshnjash: ato që ushqeheshin vetëm me formulë, ato që ushqeheshin me gji për më pak se gjashtë muaj, ato që kombinonin gjirin me formulën për gjashtë muaj dhe ato që ushqeheshin ekskluzivisht me gji gjatë gjashtë muajve të parë.
Kur fëmijët mbushën një vjeç, prindërit raportuan kohëzgjatjen e gjumit të tyre. Sipas rekomandimeve të Fondacionit Kombëtar rreth Gjumit në SHBA, gjumi i shkurtër te kjo grupmoshë konsiderohet më pak se 11 orë në 24 orë.
Rezultatet, të publikuara në revistën “European Journal of Clinical Nutrition”, treguan se foshnjat që kishin marrë qumësht gjiri kishin më pak gjasa të flinin më pak se rekomandimi krahasuar me ato që ushqeheshin vetëm me formulë, shkruan burimi Euronews transmeton Gazeta Shneta.
Në grupin që ushqehej vetëm me formulë, 12.2% e foshnjave kishin gjumë të shkurtër. Kjo përqindje ra në 10.2% te foshnjat që kishin marrë gji për më pak se gjashtë muaj, në 9.7% te ato që kombinuan gjirin me formulën dhe në vetëm 8.8% te foshnjat që ushqeheshin ekskluzivisht me gji gjatë gjashtë muajve të parë.
Pas përshtatjes së të dhënave për faktorë të tjerë që mund të ndikojnë në gjumë, studiuesit zbuluan se foshnjat e ushqyera vetëm me gji për gjashtë muaj kishin 23% më pak gjasa të kishin kohëzgjatje të shkurtër të gjumit krahasuar me ato që ushqeheshin vetëm me formulë.
Studiuesit propozojnë disa shpjegime biologjike për këtë lidhje. Qumështi i gjirit përmban melatoninën, një hormon që ndihmon në rregullimin e ritmit gjumë–zgjim dhe që sekretohet më shumë gjatë natës. Meqë të porsalindurit prodhojnë sasi të vogla të melatoninës së tyre, marrja e saj përmes qumështit të gjirit mund të ndihmojë në zhvillimin e modeleve më të shëndetshme të gjumit.
Gjithashtu, qumështi i gjirit përmban triptofan, një aminoacid që përdoret nga trupi për prodhimin e melatoninës, dhe nivelet e tij rriten gjatë natës.
Studiuesit theksojnë edhe rolin e boshtit zorrë–tru, një rrjet komunikimi mes mikrobiomës së zorrëve dhe funksionit të trurit. Gjidhënia ndihmon në zhvillimin e një mikrobiome më të shëndetshme te foshnjat, e cila mund të ndikojë pozitivisht në cilësinë e gjumit.
Organizata Botërore e Shëndetësisë (OBSh) rekomandon ushqyerjen ekskluzive me gji gjatë gjashtë muajve të parë të jetës për shkak të përfitimeve të shumta, përfshirë mbrojtjen ndaj infeksioneve dhe mbështetjen e zhvillimit afatgjatë.
Studiuesit theksojnë se gjetjet nuk nënkuptojnë se foshnjat e ushqyera me formulë nuk mund të kenë gjumë të mirë, por sfidojnë idenë e përhapur se foshnjat që ushqehen me gji flenë më pak.
Gjumi i mjaftueshëm në vitin e parë të jetës është i rëndësishëm, pasi mungesa e tij është lidhur me rrezik më të lartë për obezitet, probleme të sjelljes dhe zhvillim më të dobët njohës më vonë në jetë. /Gazeta Shneta/