Përhapja komunitare vazhdon të jetë faktori kryesor që po nxit transmetimin e fruthit në Evropë, sipas raportit të fundit mujor të publikuar nga Qendra Evropiane për Parandalimin dhe Kontrollin e Sëmundjeve (ECDC) për muajin dhjetor 2025.
Sipas të dhënave, nga janari deri në dhjetor 2025, janë raportuar gjithsej 7,655 raste të fruthit në 30 vende evropiane. Si pasojë e infeksionit, tetë persona kanë humbur jetën, përfshirë katër në Francë, tre në Rumani dhe një në Holandë.
Edhe pse numri i rasteve gjatë vitit 2025 paraqet një rënie të ndjeshme krahasuar me më shumë se 35 mijë raste të regjistruara në vitin 2024, ai mbetet pothuajse dyfish më i lartë se numri i rasteve të raportuara në vitin 2023.
ECDC thekson se fruthi është një sëmundje shumë ngjitëse, që përhapet lehtësisht përmes ajrit, dhe se vetëm një mbulim i lartë vaksinimi mund të parandalojë transmetimin nga personi në person. Për të parandaluar shpërthimet dhe për të mbrojtur grupet më të rrezikuara, si fëmijët shumë të vegjël dhe personat që nuk mund të vaksinohen për arsye mjekësore, të paktën 95% e popullsisë së përshtatshme duhet të jetë e vaksinuar me dy doza të vaksinës kundër fruthit.
Megjithatë, të dhënat tregojnë se 8 nga 10 persona që u sëmurën nga fruthi gjatë vitit 2025 nuk ishin të vaksinuar, një situatë e ngjashme me atë të vitit 2024.
Sipas ECDC-së, fëmijët nën moshën pesë vjeç mbeten veçanërisht të rrezikuar, duke përbërë 40% të rasteve të raportuara, ose 3,072 infeksione gjatë vitit 2025. Megjithatë, fruthi prek të gjitha grupmoshat, ndërsa shumica e adoleshentëve dhe të rriturve të infektuar, me status të njohur vaksinimi, nuk kishin marrë asnjë dozë të vaksinës.
Të dhënat aktuale tregojnë se shumica e rasteve janë infektuar brenda vendeve të tyre, përmes transmetimit komunitar, dhe jo si pasojë e udhëtimeve ndërkombëtare.
ECDC u bën thirrje qytetarëve të kontrollojnë statusin e vaksinimit, veçanërisht përpara udhëtimeve, duke qenë se vaksina MMR (fruth, shyta, rubeolë) kërkon të paktën dy javë për të krijuar mbrojtje. Gjithashtu, autoritetet shëndetësore rikujtojnë simptomat tipike të fruthit, të cilat përfshijnë temperaturë të lartë, kollë, rrjedhje hundësh, sy të skuqur dhe një skuqje karakteristike të lëkurës, që mund të shoqërohet me komplikime serioze.