Pirja e duhanit tek të rinjtë në Angli mund të bjerë në nivele shumë të ulëta brenda një brezi, duke sjellë përfitime të mëdha shëndetësore afatgjata.
Kështu thuhet në një studim të ri që analizon ndikimin e ligjit të propozuar në Mbretërinë e Bashkuar për krijimin e një “brezi pa duhan”.
Qeveria britanike ka propozuar një projektligj kundër duhanit, i cili synon të “thyejë ciklin e varësisë”. Sipas propozimit, do të ndalohej përgjithmonë shitja e produkteve të duhanit për këdo që ka lindur më 1 janar 2009 ose pas kësaj date. Mosha ligjore për blerjen e duhanit do të rritej me një vit çdo vit, duke e bërë praktikisht të pamundur që brezat e rinj të kenë qasje ligjore në cigare.
Sipas modelimit të realizuar nga studiuesit në Universitetin e Nottingham-it, përhapja e duhanpirjes tek të rinjtë 12–30 vjeç mund të bjerë nën 5 për qind deri në fund të viteve 2040 – dekada më herët sesa do të ndodhte pa këtë ligj.
Madje, edhe nën supozime më konservatore – ku ulja e nisjes së duhanit llogaritet vetëm rreth 5 për qind në vit (krahasuar me 30 për qind që parashikon qeveria) – përfitimet afatgjata për shëndetin mbeten të konsiderueshme.
Nëse realizohen pritjet më optimiste të qeverisë, niveli i duhanpirjes tek të rinjtë mund të bjerë nën 5 për qind që në vitet 2030.
88 mijë vite jete më të shëndetshme deri në vitin 2075
Studiuesit vlerësojnë se deri në vitin 2075, ligji mund të sjellë rreth 88 mijë vite shtesë jete të shëndetshme krahasuar me një skenar pa ndryshime ligjore.
Përfitimet më të mëdha pritet të ndodhin në komunitetet me të ardhura më të ulëta, ku duhanpirja është më e përhapur. Rreth 30 për qind e viteve shtesë të jetës së shëndetshme parashikohet të përqendrohen në 20 për qindëshin më të varfër të lagjeve.
Megjithatë, studiuesit paralajmërojnë se përparimi mund të mos jetë i barabartë për të gjithë. Burrat dhe personat nga komunitetet me të ardhura të ulëta mund ta arrijnë më vonë këtë objektiv, nëse nuk ofrohet mbështetje e synuar.
Autorët theksojnë se mënyra e zbatimit të ligjit do të jetë vendimtare. Forcimi i kontrollit, komunikimi i qartë dhe mbështetja për lënien e duhanit në komunitetet më të prekura mund të përshpejtojnë përfitimet dhe të ulin pabarazitë.
Organizatat shëndetësore e kanë mirëpritur studimin, duke e cilësuar projektligjin si një hap historik për mbrojtjen e brezave të ardhshëm nga varësia e kushtueshme dhe vdekjeprurëse ndaj duhanit.
Ligji i propozuar është ende në shqyrtim në Parlamentin britanik. Nëse miratohet, Mbretëria e Bashkuar do të ketë një nga masat më të ashpra kundër duhanit në botë, krahas vendeve si Maldivet. Ndërkohë, Zelanda e Re – vendi i parë që tentoi një ndalim të tillë për brezat e ardhshëm – e tërhoqi planin në vitin 2023.
Sipas të dhënave të mëhershme nga agjencitë shëndetësore, më shumë se një në dhjetë vdekje tek personat mbi 35 vjeç në disa pjesë të Mbretërisë së Bashkuar lidhet me pirjen e duhanit, çka e bën këtë çështje një prioritet madhor të shëndetit publik./Gazeta Shneta/