Një studim i ri i publikuar në revistën shkencore Alzheimer’s & Dementia Translational Research and Clinical Interventions ka zbuluar se të moshuarit që marrin pjesë në trajnime kompjuterike për “shpejtësinë njohëse” mund të ulin rrezikun e zhvillimit të demencës deri në 20 vjet.
Sipas Alzheimer’s Disease International, mbi 55 milionë njerëz në mbarë botën jetonin me demencë në vitin 2020, ndërsa ky numër pritet të arrijë në 78 milionë deri në vitin 2030. Demenca përfshin një grup çrregullimesh që ndikojnë në kujtesë, mendim dhe aftësi për funksionim të përditshëm, shkruan Medical News, transmeton Gazeta Shneta.
Ekspertët theksojnë se ekzistojnë disa faktorë të njohur rreziku për demencën. Disa prej tyre, si mosha dhe predispozita gjenetike, nuk mund të ndryshohen. Megjithatë, faktorë të tjerë janë të modifikueshëm, përfshirë ushqyerjen e shëndetshme, aktivitetin fizik, menaxhimin e stresit dhe mbajtjen aktive të trurit gjatë plakjes.
Studimi i fundit u përqendrua në një formë specifike të ushtrimeve mendore të quajtura “trajnim i shpejtësisë njohëse”, që realizohet përmes programeve kompjuterike të dizajnuara për të përmirësuar përpunimin e shpejtë të informacionit. Rezultatet treguan se pjesëmarrësit që u angazhuan në këtë lloj trajnimi kishin rrezik dukshëm më të ulët për zhvillimin e demencës, me efekte mbrojtëse që mund të zgjasin deri në dy dekada.
Studiuesit theksojnë se, edhe pse nuk është e mundur të parashikohet me saktësi se kush do të zhvillojë demencë, ndërhyrjet që stimulojnë aktivitetin mendor mund të luajnë rol të rëndësishëm në uljen e rrezikut. Gjetjet e reja forcojnë idenë se kujdesi për shëndetin e trurit duhet të jetë pjesë e stilit të jetesës, sidomos në moshë të shtyrë. /Gazeta Shneta/