Kanceri i gjirit vazhdon të jetë kanceri më i zakonshëm tek gratë në botë dhe numri i rasteve të reja pritet të rritet ndjeshëm në dekadat e ardhshme.
Një analizë e re e publikuar në The Lancet Oncology parashikon se rastet vjetore do të rriten nga 2.3 milionë në vitin 2023 në mbi 3.5 milionë deri në vitin 2050.
Sipas studimit, edhe vdekjet nga kanceri i gjirit pritet të rriten me 44%, duke arritur nga rreth 764 mijë në afro 1.4 milionë në vit. Rritja më e shpejtë po vërehet në vendet me të ardhura të ulëta, ku qasja në diagnostikim të hershëm dhe trajtim cilësor mbetet e kufizuar.
Analiza tregon se edhe pse normat e rasteve të reja janë më të larta në vendet e pasura, barra e sëmundjes po zhvendoset drejt vendeve me më pak burime. Ndërkohë, rastet tek gratë e moshës 20–54 vjeç janë rritur me 29% që nga viti 1990.
Rreth 28% e barrës globale të kancerit të gjirit lidhet me faktorë të modifikueshëm të stilit të jetesës, përfshirë konsumimin e lartë të mishit të kuq, duhanin, sheqerin e lartë në gjak, mbipeshën, alkoolin dhe mungesën e aktivitetit fizik.
Autorët theksojnë se përmirësimi i stilit të jetesës, zbulimi i hershëm dhe qasja e barabartë në trajtim janë thelbësore për të frenuar rritjen e kësaj sëmundjeje në nivel global./Gazeta Shneta/