Mbajtja e trurit aktiv gjatë gjithë jetës përmes leximit, zgjidhjes së enigmave ose mësimit të aftësive të reja mund të ndihmojë në vonimin e sëmundjes së Alzheimerit dhe në ngadalësimin e rënies së funksioneve njohëse. Ky është përfundimi i një studimi të ri shkencor që analizoi lidhjen mes aktivitetit mendor dhe rrezikut për demencë.
Studiuesit zbuluan se njerëzit që angazhohen rregullisht në aktivitete intelektuale – si leximi, shkrimi, mësimi i një gjuhe të huaj, loja e shahut, zgjidhja e puzzle-ve ose vizitat në muze – kanë më pak gjasa të zhvillojnë demencë. Sipas ekspertëve, nuk është e rëndësishme vetëm një aktivitet i vetëm, por përfshirja e vazhdueshme në aktivitete që stimulojnë mendjen dhe që njerëzit i bëjnë me pasion, shkruan burimi Euronews Health transmeton Gazeta Shneta.
Studimi përfshiu rreth 2,000 persona të moshës 53 deri në 100 vjeç, të cilët në fillim nuk kishin shenja të demencës. Pjesëmarrësit u ndoqën për tetë vjet dhe iu nënshtruan testeve neurologjike, ndërsa studiuesit analizuan nivelin e aktiviteteve mendore që ata kishin kryer gjatë rinisë, moshës së mesme dhe pleqërisë.
Rezultatet treguan se tek personat me nivelet më të larta të aktiviteteve intelektuale gjatë jetës, Alzheimeri u shfaq mesatarisht rreth pesë vjet më vonë krahasuar me ata që kishin më pak stimulim mendor. Gjithashtu, ata përjetuan një rënie më të ngadaltë të kujtesës dhe të aftësive të të menduarit.
Shkencëtarët e quajnë këtë fenomen “rezervë njohëse”, që nënkupton aftësinë e trurit për të krijuar lidhje më të forta nervore dhe për të kompensuar dëmtimet që mund të shkaktohen nga plakja ose sëmundjet.
Ekspertët theksojnë se edhe ata që nuk kanë qenë shumë aktivë mendërisht në rini mund të fillojnë më vonë, pasi edhe në moshën e mesme është e mundur të përmirësohet shëndeti i trurit. /Gazeta Shneta/