Një rast i pazakontë u raportua në Gjermani, ku një burrë 62‑vjeçar pretendoi se kishte marrë 217 doza të vaksinave kundër COVID‑19 gjatë një periudhe prej rreth 29 muajsh, një numër jashtëzakonisht i madh krahasuar me rekomandimet zyrtare për vaksinim.
Studiuesit nga Universiteti Erlangen‑Nürnberg u interesuan për këtë rast si një rast unik për të studiuar reagimin e sistemit imunitar ndaj vaksinimeve të përsëritura, shkruan The Guardian, transmeton Gazeta Shneta.
Ata kontaktuan personin dhe ai pranoi të bënte teste të hollësishme mjekësore, përfshirë analiza të gjakut dhe mostrat e tjera biologjike. Nga 217 vaksina, 134 u konfirmuan zyrtarisht në regjistrat mjekësorë, ndërsa pjesa tjetër ishte e vetëdeklaruar.
Analizat treguan se sistemi i tij imunitar ishte plotësisht funksional dhe nivelet e antitrupave dhe qelizave T kundër SARS‑CoV‑2 ishin më të larta se te njerëzit që kishin marrë tri doza të zakonshme, pa efekte serioze anësore të lidhura me numrin e madh të vaksinave.
Rasti filloi pasi autoritetet gjermane hapën një hetim për shpërndarje të certifikatave të vaksinimit të falsifikuara në treg, megjithatë nuk u ngritën akuza penale ndaj tij.
Ekspertët e shëndetësisë theksuan se ky është një rast ekstrem dhe nuk duhet të merret si model për publikun; rekomandimet zyrtare mbeten tri doza kryesore, me doza përforcuese sipas udhëzimeve mjekësore.
Ky rast përdoret si një “eksperiment natyral” për të kuptuar se si reagojnë sistemi imunitar dhe nivelet e antitrupave ndaj vaksinimeve të shumta, duke treguar se sistemi mbeti i shëndetshëm, por shkencëtarët dhe mjekët nënvizojnë se nuk ka arsye për të bërë doza të shumta pa udhëzime mjekësore.