Një studim i ri sugjeron se vetëm 20 minuta çiklizëm me intensitet të moderuar rrisin aktivitetin në hipokampus, një rajon kyç për të mësuarit dhe kujtesën. Ky rritje e aktivitetit mund të ndihmojë në konsolidimin e kujtesës, duke mbështetur trurin në përpunimin dhe ruajtjen e informacionit.
Studiuesit vunë re se intensiteti më i lartë i ushtrimeve lidhej me aktivitet më të fortë të trurit, duke sugjeruar se niveli i aktivitetit fizik mund të ndikojë në fuqinë e reagimit të kujtesës, shkruan burimi Medical News Today transmeton Gazeta Shneta.
Aktivitetet tradicionale për trajnimin e trurit zakonisht fokusohen në stimulimin e rajoneve të veçanta të trurit që lidhen me kujtesën, si hipokampusi. Në kafshë, studiuesit kanë regjistruar “valë” të aktivitetit neural të lidhura me kujtesën, por lidhja e drejtpërdrejtë tek njerëzit ka qenë e vështirë për t’u konfirmuar.
Ky studim, i publikuar në “Brain Communications”, përdori elektroencefalografi intracraniale (iEEG), një metodë që regjistron aktivitetin e trurit me saktësi të lartë përmes elektrodave të vendosura brenda trurit.
14 pjesëmarrës me moshë nga 17 deri në 50 vjeç, të cilëve u ishin vendosur elektrodë për trajtimin e epilepsisë, kryen një seancë 20-minutëshe çiklizmi me ritëm të rehatshëm.
Pas aktivitetit fizik, studiuesit vërejtën një rritje të dukshme të valëve të shpejta në hipokampus, të cilat u përhapën në rajone të tjera të trurit që përpunojnë dhe rikujtojnë informacion.
Siç shpjegoi Dr. Juan Ramirez-Villegas, këto valë përfaqësojnë shpërthime të shkurtra aktiviteti të sinkronizuar që ndihmojnë trurin të stabilizojë kujtimet dhe t’i ruajë ato si kujtime afatgjata.
Këto zbulime ofrojnë disa nga provat e para direkte se si aktiviteti fizik mund të përmirësojë funksionet njohëse në njerëz, duke treguar një lidhje të drejtpërdrejtë mes ushtrimit dhe aktivitetit neural për kujtesën. /Gazeta Shneta/