Në Spitalin e Përgjithshëm në Pejë është funksionalizuar për herë të parë shërbimi i logopedisë, duke plotësuar një nevojë të kahershme për trajtimin e çrregullimeve të të folurit tek fëmijët dhe pacientët e tjerë.
Sipas njoftimit, që nga 15 shtatori 2025, logopedi Aldemir Kalaq ka nisur ofrimin e këtij shërbimi, ndërsa vetëm gjatë gjashtë muajve të parë janë realizuar gjithsej 639 vizita, transmeton Gazeta Shneta.
Prej tyre, 591 vizita janë kryer në repartin e Pediatrisë, kryesisht me fëmijë që kanë vështirësi në të folur, ndërsa 48 vizita në Neurologji, për pacientë që kanë probleme në komunikim pas goditjeve në tru.
Rritja e kërkesës për këtë shërbim reflektohet edhe në listën e pritjes, ku aktualisht mbi 100 pacientë presin për trajtim logopedik.
Sipas spitalit, trajtimi zhvillohet me dy seanca në javë dhe zakonisht zgjat nga 3 deri në 6 muaj. Rezultatet konsiderohen inkurajuese, pasi në rreth 15 raste është vërejtur përparim i dukshëm tek fëmijët.
Logopedi Aldemir Kalaq u bën thirrje prindërve që të ndjekin me kujdes zhvillimin e të folurit tek fëmijët, të komunikojnë me ta që në ditët e para të jetës dhe të kufizojnë përdorimin e telefonave dhe televizorit.
Sipas rekomandimeve, fëmijët duhet të kalojnë nëpër disa etapa të zhvillimit të të folurit, duke filluar nga reagimi ndaj zërit në muajt e parë, deri tek formimi i fjalive të thjeshta rreth moshës 2–3 vjeç.
Në rast se këto etapa nuk ndiqen, specialistët rekomandojnë konsultim të hershëm me pediatrin dhe logopedin, si dhe kontroll të dëgjimit.
Nga Spitali i Përgjithshëm në Pejë theksohet se ky shërbim do të vazhdojë të zgjerohet, me qëllim mbështetjen e zhvillimit të shëndetshëm të fëmijëve dhe përmirësimin e cilësisë së jetës së pacientëve./Gazeta Shneta/