Cigaret elektronike me nikotinë mund të jenë më efektive se metodat tradicionale si çamçakëzët apo flasterët për lënien e duhanit, por ekspertët theksojnë se ato nuk janë pa rrezik dhe nuk duhet të përdoren nga personat që nuk pinë duhan.
Kështu thuhet në një studim të ri të realizuar nga studiues të University of Oxford dhe të publikuar në revistën shkencore Addiction.
Sipas hulumtimit, cigaret elektronike me nikotinë rezultojnë më efikase në ndihmën për ndërprerjen e duhanit krahasuar me terapitë zëvendësuese të nikotinës (NRT), siç janë çamçakëzët dhe flasterët, shkruan Euronews Health transmeton Gazeta Shneta.
Studiuesit analizuan 14 rishikime sistematike të realizuara ndërmjet viteve 2014 dhe 2023. Një ndër to, një analizë e vitit 2024 nga Cochrane, tregoi se për çdo 100 përdorues, dy deri në pesë persona më shumë arrijnë ta lënë duhanin duke përdorur cigare elektronike me nikotinë, krahasuar me metodat tradicionale.
“Provat janë të qarta dhe të qëndrueshme: cigaret elektronike ndihmojnë njerëzit të ndalojnë duhanin”, ka deklaruar studiuesja Angela Difeng Wu nga Universiteti i Oksfordit.
Megjithatë, ekspertët paralajmërojnë se efektet anësore afatgjata mbeten ende të paqarta. Ndërsa për ngjarjet serioze nuk ka ende prova përfundimtare, për shumicën e efekteve të tjera nuk janë vërejtur dallime të mëdha mes cigareve elektronike dhe trajtimeve të tjera.
Një studim i publikuar në shkurt të vitit 2026 thekson se, edhe pse nuk ka prova të drejtpërdrejta që cigaret elektronike shkaktojnë kancer tek njerëzit, përdoruesit e tyre ekspozohen ndaj kimikateve potencialisht kancerogjene. Megjithatë, krahasuar me duhanin tradicional, ekspozimi ndaj këtyre substancave është dukshëm më i ulët.
Nga ana tjetër, OBSH vazhdon të mbajë një qëndrim kritik ndaj cigareve elektronike, veçanërisht për shkak të përdorimit të tyre nga të rinjtë. Sipas të dhënave të vitit 2025, mbi 100 milionë njerëz në botë përdorin cigare elektronike, përfshirë të paktën 15 milionë fëmijë të moshës 13 deri në 15 vjeç.
OBSH paralajmëron se fëmijët kanë deri në nëntë herë më shumë gjasa të përdorin cigare elektronike sesa të rriturit, duke rritur shqetësimet për një valë të re varësie nga nikotina./Gazeta Shneta/