Kolegji Amerikan i Mjekësisë së Sportit (ACSM) ka publikuar udhëzimet e reja për stërvitjen me rezistencë për vitin 2026, për herë të parë pas 17 vitesh. Ky përditësim bazohet në 137 rishikime sistematike me mbi 30,000 pjesëmarrës dhe përdor metodologji më të avancuara si “GRADE”, duke zëvendësuar qasjet e mëparshme të bazuara kryesisht në opinion ekspertësh.
Ndryshe nga udhëzimet e vitit 2009, të cilat ishin më të ngurta dhe të ndërlikuara, versioni i ri thekson fleksibilitetin dhe rëndësinë e qëndrueshmërisë në stërvitje.
Ekspertët theksojnë se faktorë si pajisjet, variacioni i ushtrimeve apo struktura komplekse nuk janë aq vendimtarë sa mendohej më parë, shkruan burimi Medical News Today transmeton Gazeta Shneta.
Udhëzimet e reja fokusohen te “stërvitja progresive me rezistencë” dhe japin rekomandime sipas objektivave:
– Për forcë: përdorimi i peshave të rënda (rreth 80% e maksimumit), 2–3 seri dhe të paktën dy herë në javë.
– Për rritje muskulore: volum më i lartë (të paktën 10 seri në javë për grup muskulor) dhe fokus në fazën zbritëse të ushtrimit.
– Për fuqi: pesha më të lehta dhe lëvizje të shpejta.
– Për shëndet të përgjithshëm: ushtrime të shpejta për përmirësimin e lëvizshmërisë dhe balancës.
Një pjesë kyçe e përditësimit është rrëzimi i disa miteve të vjetra. Së pari, stërvitja deri në dështim nuk është e domosdoshme për forcë apo rritje muskulore. Së dyti, nuk kërkohet pajisje e veçantë apo ndryshime të vazhdueshme në program. Së treti, bazat e stërvitjes janë efektive për të gjithë, pavarësisht nivelit të përvojës.
Në përfundim, udhëzimet e reja theksojnë thjeshtësinë dhe konsistencën si çelës për rezultate afatgjata. /Gazeta Shneta/