Aktiviteti fizik, veçanërisht ecja, mbetet një nga faktorët më të rëndësishëm për shëndetin.
Një studim i ri i publikuar në “American Journal of Preventive Medicine”, tregon se ecja e përditshme – sidomos me ritëm të shpejtë – mund të ulë ndjeshëm rrezikun e vdekshmërisë, veçanërisht te personat me të ardhura të ulëta dhe komunitetet me ngjyrë.
Sipas Medical News Today, studimi u bazua në të dhënat e 79,856 pjesëmarrësve nga 12 shtete juglindore të Shteteve të Bashkuara, pjesë e “Southern Community Cohort Study”. Dy të tretat e pjesëmarrësve ishin me ngjyrë, ndërsa mbi gjysma kishin të ardhura nën 15,000 dollarë në vit.
Studiuesit analizuan zakonet e përditshme të ecjes, duke përfshirë shpejtësinë dhe kohëzgjatjen, si dhe faktorë të tjerë si pirja e duhanit, konsumimi i alkoolit dhe aktiviteti fizik gjatë kohës së lirë.
Pas një periudhe ndjekjeje mesatare prej rreth 17 vjetësh, u regjistruan afro 27,000 vdekje, ku shumica lidhej me sëmundjet kardiovaskulare.
Rezultatet treguan se ecja me ritëm të shpejtë lidhej me një ulje prej rreth 20% të rrezikut të vdekshmërisë. Ndërkohë, edhe personat që ecnin me ritëm më të ngadaltë për më shumë se një orë në ditë përfitonin ndjeshëm, veçanërisht në uljen e rrezikut për sëmundjen ishemike të zemrës, përcjell Gazeta Shneta.
Studimi nënvizon rëndësinë jo vetëm të ecjes, por edhe të ritmit të saj, duke inkurajuar përfshirjen e aktivitetit fizik në përditshmëri për një jetë më të gjatë dhe një shëndet më të mirë kardiovaskular. /Gazeta Shneta/