Një studim i ri paralajmëron se sifilizi, një infeksion seksualisht i transmetueshëm, mund të ketë pasoja serioze afatgjata për shëndetin e zemrës dhe enëve të gjakut nëse nuk trajtohet me kohë. Rastet e sifilizit janë rritur ndjeshëm në Shtetet e Bashkuara vitet e fundit, duke ngritur shqetësime të reja për ndikimin e tij në sëmundjet kardiovaskulare.
Sifilizi shkaktohet nga bakteria Treponema pallidum dhe përhapet përmes kontaktit seksual.
Edhe pse është një sëmundje që mund të kurohet lehtësisht me antibiotikë, përfshirë një injeksion të vetëm me penicilinë në disa raste, trajtimi i vonuar mund të shkaktojë dëmtime serioze në tru, nerva, sy, veshë, mëlçi dhe organe të tjera, shkruan burimi Health Day transmeton Gazeta Shneta.
Studimi, i publikuar në “JAMA Network Open”, analizoi të dhënat e rreth 1,500 pacientëve me sifiliz dhe i krahasoi me mbi 7,000 persona pa infeksion, duke i ndjekur për 15 vite.
Rezultatet treguan se personat me sifiliz kishin rrezik dukshëm më të lartë për probleme kardiovaskulare.
Ata kishin dyfish më shumë rrezik për aneurizëm të aortës, një gjendje e rrezikshme ku muri i arteries kryesore zgjerohet dhe mund të çahet.
Gjithashtu, u vu re rritje e rrezikut për goditje në tru, si ato të shkaktuara nga gjakderdhja ashtu edhe nga mpiksjet, si dhe rritje e rrezikut për infarkt të zemrës.
Për herë të parë, studimi lidhi gjithashtu sifilizin me sëmundjen e arterieve periferike, e cila shkakton dhimbje dhe çrregullime të qarkullimit në gjymtyrë.
Studiuesit theksojnë se, megjithëse nuk mund të provohet një lidhje direkte shkak-pasojë, inflamacioni kronik i shkaktuar nga sifilizi mund të përshpejtojë sëmundjet e zemrës.
Këto efekte mund të vazhdojnë edhe pas trajtimit të infeksionit.
Ekspertët paralajmërojnë se shumë nga këto komplikime mund të mos njihen mjaftueshëm në praktikën mjekësore dhe nuk duhet të injorohen, sidomos tek pacientët me infeksion të gjatë ose të patrajtuar. /Gazeta Shneta/