Shkencëtarët kanë zbuluar se ndërprerjet e shkurtra të aktivitetit në tru tek personat me epilepsi mund të parashikohen deri në një sekondë përpara se të ndodhin, duke hapur mundësi të reja për trajtim më efektiv.
Hulumtimi, i realizuar nga studiues në University of California San Francisco dhe i publikuar në Nature Neuroscience, fokusohet në të ashtuquajturat “brain blips” – shpërthime të shkurtra të aktivitetit jonormal në tru, të njohura si interictal epileptiform discharges (IEDs).
Këto episode, të cilat mund të ndodhin mijëra herë në ditë, ndikojnë në kujtesë, përqendrim, gjuhë dhe gjumë.
Sipas studiuesve, ndryshe nga sa mendohej më parë, këto shpërthime nuk janë të rastësishme, por ndjekin një model të parashikueshëm.
Përmes teknologjisë së avancuar, shkencëtarët arritën të identifikojnë aktivitetin e neuroneve që paralajmëron këto episode rreth një sekondë para se të ndodhin.
Në studim janë analizuar mbi 1,000 neurone tek katër pacientë që i janë nënshtruar operacionit për epilepsi.
Për këtë qëllim u përdorën pajisje të quajtura “Neuropixels”, të cilat mundësojnë regjistrimin e aktivitetit të neuroneve individuale në thellësi të trurit, duke ofruar një pamje tredimensionale të funksionimit të tij.
Sipas autorit të studimit, Jon Kleen, kjo qasje ofron mundësi të reja për të kuptuar dhe trajtuar më mirë efektet e epilepsisë që ndikojnë në funksionet njohëse.
Studiuesit zbuluan se rreth 80% e neuroneve të përfshira në këto episode janë të lidhura me procese normale si gjuha dhe perceptimi.
Kjo shpjegon pse pacientët gjatë këtyre momenteve mund të humbasin përkohësisht rrjedhën e mendimit apo të kenë vështirësi në të folur.
Zbulimi mund të ndihmojë në zhvillimin e pajisjeve që jo vetëm reagojnë ndaj aktivitetit jonormal, por e parandalojnë atë përpara se të ndodhë.
Ekspertët theksojnë se kjo do të përbënte një hap të madh përpara, duke kaluar nga trajtimi reaktiv në atë parandalues, dhe duke përmirësuar ndjeshëm cilësinë e jetës për personat me epilepsi./Gazeta Shneta/