Ekspozimi ndaj mikroplastikave në ushqim po bëhet gjithnjë e më i zakonshëm, paralajmërojnë mediat ndërkombëtare, ndërsa ekspertët ngrenë shqetësime për ndikimin e tyre në shëndet.
Këto grimca të padukshme mund të depërtojnë në ushqim jo vetëm nga mjedisi, por edhe gjatë gatimit. Mikroplastikat mund të lirohen nga uji i rubinetit, nga paketimet plastike apo edhe nga enët e kuzhinës, veçanërisht kur ato ekspozohen ndaj temperaturave të larta, shkruan BBC, transmeton Gazeta Shneta.
Gjatë gatimit në tigane apo enë të veshura me materiale sintetike, nxehtësia mund të shkaktojë çlirimin e këtyre grimcave, të cilat përzihen me ushqimin. Këto përfshijnë mikroplastikat dhe nanoplastikat, që janë aq të vogla sa mund të futen lehtësisht në organizëm përmes ushqimit dhe ujit.
Sipas ekspertëve, mikroplastikat gjenden tashmë pothuajse kudo në ajër, ujë dhe produkte ushqimore duke e bërë ekspozimin pothuajse të pashmangshëm. Megjithatë, ka disa mënyra për ta reduktuar atë, si shmangia e ngrohjes së ushqimit në enë plastike, përdorimi i enëve prej çeliku apo qelqi dhe filtrimi i ujit të pijshëm.
Ndërsa kërkimet vazhdojnë, shkencëtarët ende po studiojnë efektet afatgjata të mikroplastikave në trupin e njeriut, por shqetësimet lidhen me inflamacionin, ndikimet hormonale dhe akumulimin e tyre në organe.
Ky fenomen tregon se edhe zgjedhjet e përditshme në kuzhinë mund të kenë ndikim në ekspozimin tonë ndaj ndotësve të padukshëm, duke e bërë ndërgjegjësimin dhe kujdesin më të rëndësishëm se kurrë. /Gazeta Shneta/