Ekspozimi i njëkohshëm ndaj kimikateve të rrezikshme dhe efekteve të ndryshimeve klimatike mund të ketë pasoja më të mëdha sesa mendohej për shëndetin riprodhues, raportojnë mediat ndërkombëtare.
Një rishikim i ri shkencor tregon se kombinimi i kimikateve që prishin sistemin hormonal dhe faktorëve si nxehtësia ekstreme mund të krijojë një efekt “sinergjik”, duke rritur ndjeshëm dëmin në pjellori, shkruan The Guardian, transmeton Gazeta Shneta.
Këto kimikate, të njohura si ndërprerës endokrinë, gjenden shpesh në plastikë dhe produkte të përditshme. Kur ato kombinohen me stresin nga temperaturat e larta një pasojë e ndryshimeve klimatike ndikimi i tyre në organizëm bëhet edhe më i fortë.
Studimi, i udhëhequr nga Susanne Brander nga Oregon State University, thekson se megjithëse efektet e secilit faktor janë studiuar më vete, shumë pak dihet për ndikimin e tyre të kombinuar. Sipas saj, ky kombinim përbën një kërcënim “alarmues” për pjellorinë në të gjitha speciet, përfshirë njerëzit.
Paralajmërimet për një rënie globale të lindshmërisë janë përforcuar edhe nga të dhënat e Institute for Health Metrics and Evaluation në University of Washington, të cilat tregojnë se deri në vitin 2050, mbi tre të katërtat e vendeve mund të bien nën normën e zëvendësimit të popullsisë.
Ekspertët kërkojnë më shumë kërkime dhe masa parandaluese, duke theksuar se ndërveprimi mes ndotjes kimike dhe krizës klimatike mund të ketë pasoja afatgjata për të ardhmen e njerëzimit. /Gazeta Shneta/