Hulumtime të fundit shkencore po tregojnë se analizat moderne të gjakut, përmes biomarkerëve të ndryshëm, mund të japin informacion të vlefshëm për gjendjen e përgjithshme shëndetësore të një personi dhe për rrezikun e vdekjes së hershme.
Sipas studimeve, shkencëtarët kanë identifikuar se disa tregues në gjak mund të lidhen me mënyrën se si po plaket organizmi, shkruan Nature, transmeton Gazeta Shneta.
Këta tregues, të njohur si biomarkerë, përfshijnë indikatorë të inflamacionit, funksionit të mëlçisë dhe veshkave, si dhe procese metabolike. Kombinimi i tyre mund të ndihmojë në krijimin e një “profili të rrezikut biologjik”, i cili tregon se sa i shëndetshëm është trupi në nivel qelizor dhe funksional.
Studiuesit theksojnë se kjo metodë nuk mund të parashikojë saktësisht jetëgjatësinë e një individi, por mund të shërbejë si një mjet i rëndësishëm për identifikimin e personave me rrezik më të lartë për zhvillimin e sëmundjeve kronike, si sëmundjet kardiovaskulare, diabeti apo çrregullimet metabolike.
Sipas ekspertëve, zhvillimi i këtyre testeve mund të ndryshojë mënyrën se si mjekësia e trajton parandalimin, duke u fokusuar më shumë në zbulimin e hershëm të rrezikut dhe ndërhyrjen në faza më të hershme.
Megjithatë, studiuesit theksojnë se nevojiten më shumë kërkime për të standardizuar këto analiza dhe për t’i bërë ato të përdorshme gjerësisht në praktikën klinike. /Gazeta Shneta/