Një studim i rëndësishëm klinik ka treguar se ilaçi semaglutid (i njohur si Ozempic/Wegovy) mund të ndihmojë personat që vuajnë nga çrregullimi i përdorimit të alkoolit.
Sipas rezultateve të publikuara, pacientët që morën këtë trajtim patën dukshëm më pak ditë me konsum të tepruar të alkoolit krahasuar me ata që morën placebo.
Studimi përfshiu 108 persona me obezitet dhe varësi ndaj alkoolit, të cilët u ndanë rastësisht në dy grupe për një periudhë 26-javore.
Në fund të studimit, ata që përdorën semaglutide shënuan një ulje prej 41% të ditëve me konsum të rëndë, ndërsa grupi placebo vetëm 26%, shkruan burimi Health Day transmeton Gazeta Shneta.
Gjithashtu, konsumi mesatar mujor i alkoolit dhe numri i pijeve ditore ranë më ndjeshëm tek grupi që mori ilaçin.
Ekspertët besojnë se ky efekt lidhet me mënyrën se si ilaçi ndikon në tru, duke reduktuar dëshirën për alkool dhe kënaqësinë që ai sjell.
Për më tepër, semaglutide ngadalëson zbrazjen e stomakut, çka ul oreksin dhe ndihmon në reduktimin e kalorive – përfshirë ato që vijnë nga alkooli.
Ky zbulim konsiderohet një hap i madh përpara, pasi ofron një qasje të re trajtimi për këtë çrregullim kompleks.
Studiuesit theksojnë se nevojiten hapa të mëtejshëm, përfshirë miratimin nga autoritetet shëndetësore, në mënyrë që ky trajtim të bëhet më gjerësisht i disponueshëm për pacientët në nevojë. /Gazeta Shneta/