Kompania farmaceutike Bayer ka publikuar rezultate premtuese për ilaçin eksperimental “asundexian”, një hollues gjaku i gjeneratës së re që mund të ulë rrezikun e goditjeve të përsëritura në tru pa rritur ndjeshëm rrezikun e gjakderdhjeve serioze.
Rezultatet vijnë nga studimi i fazës III “OCEANIC-STROKE”, ku morën pjesë mbi 12 mijë pacientë që kishin kaluar më parë stroke ishemike ose episode neurologjike kalimtare (TIA), shkruan Reuters, transmeton Gazeta Shneta.
Sipas të dhënave të publikuara, pacientët që morën asundexian patën më pak rikthime të stroke krahasuar me grupin që mori trajtim standard dhe placebo. Rreth 6.2% e pacientëve që përdorën ilaçin përjetuan një tjetër stroke, kundrejt 8.4% në grupin kontrollues.
Ekspertët e konsiderojnë këtë zhvillim potencialisht të rëndësishëm sepse shumica e holluesve aktualë të gjakut, edhe pse efektivë në parandalimin e mpiksjeve, shoqërohen me rrezik të lartë të hemorragjive serioze, veçanërisht gjakderdhjeve në tru.
Në studim, asundexian nuk tregoi rritje domethënëse të gjakderdhjeve intracerebrale apo komplikimeve të mëdha hemorragjike.
Ilaçi funksionon duke bllokuar faktorin XIa, një proteinë kyçe në procesin e mpiksjes së gjakut. Studiuesit besojnë se kjo metodë mund të pengojë krijimin e mpiksjeve të rrezikshme duke ruajtur njëkohësisht mekanizmat normalë të ndalimit të gjakderdhjes, gjë që mund ta bëjë terapinë më të sigurt për përdorim afatgjatë.
Sipas të dhënave të studimit, pacientët që morën asundexian jo vetëm që kishin më pak rikthime të stroke, por edhe rastet që ndodhën rezultuan më pak të rënda, me më pak pasoja të përhershme neurologjike dhe nevojë më të ulët për ndërhyrje emergjente.
Megjithatë, ilaçi ende nuk është miratuar për përdorim të gjerë klinik. Bayer ka bërë të ditur se po vazhdon procedurat me autoritetet rregullatore ndërkombëtare për të siguruar aprovimin e tij në tregjet globale.
Ekspertët theksojnë se do të nevojiten analiza dhe monitorime shtesë afatgjata për të konfirmuar plotësisht sigurinë dhe efektivitetin e terapisë. /Gazeta Shneta/