Zbulimet e fundit shkencore mbi rolin e baktereve në formimin e gurëve në veshka po hapin rrugë për zhvillimin e trajtimeve të reja që synojnë parandalimin e tyre pa nevojën e ndërhyrjeve kirurgjikale.
Studiuesit po fokusohen tek mikrobioma urinare komuniteti i baktereve që jetojnë në traktin urinar dhe ndikimi i saj në krijimin e kristaleve minerale që formojnë gurët renalë, shkruan NIH, transmeton Gazeta Shneta.
Sipas kërkimeve, disa lloje bakteresh mund të ndikojnë drejtpërdrejt në mënyrën se si organizmi përpunon minerale si kalciumi dhe oksalati, substanca që lidhen ngushtë me formimin e gurëve.
Shkencëtarët po studiojnë nëse balancimi i këtyre baktereve mund të ulë rrezikun e krijimit dhe rikthimit të gurëve tek pacientët që vuajnë shpesh nga kjo gjendje.
Ekspertët besojnë se në të ardhmen trajtimi mund të përfshijë terapi biologjike, probiotikë të specializuar apo metoda të tjera që synojnë ndryshimin e mikrobiomës urinare për të parandaluar formimin e kristaleve përpara se ato të bëhen problem serioz shëndetësor.
Nëse këto terapi rezultojnë efektive, ato mund të ndryshojnë ndjeshëm mënyrën e trajtimit të një prej problemeve më të zakonshme urinare në botë, duke reduktuar nevojën për procedura invazive dhe duke përmirësuar cilësinë e jetës së pacientëve. /Gazeta Shneta/