Një studim i ri ka treguar se yndyra e fshehur brenda muskujve mund të rrisë rrezikun për probleme të zemrës dhe çrregullime metabolike, edhe tek personat që duken të shëndetshëm.
Kjo yndyrë, e njohur si yndyrë ndërmuskulare, grumbullohet mes fibrave muskulore dhe konsiderohet më e rrezikshme sepse nuk është e dukshme nga jashtë, shkruan burimi Medical News Today transmeton Gazeta Shneta.
Studimi përfshiu mbi 11 mijë të rritur pa sëmundje të njohura paraprake. Përmes analizave me rezonancë magnetike dhe inteligjencë artificiale, studiuesit matën sasinë e muskujve të dobët dhe yndyrës së fshehur në trup.
Rezultatet treguan se personat me më shumë yndyrë në muskuj kishin më shumë gjasa të vuanin nga tensioni i lartë, niveli i paqëndrueshëm i sheqerit në gjak dhe kolesteroli i pashëndetshëm.
Nga ana tjetër, masa më e madhe muskulore rezultoi mbrojtëse për shëndetin metabolik, veçanërisht tek meshkujt.
Tek gratë, efekti mbrojtës nuk u vu re në të njëjtën masë, gjë që mund të lidhet me ndryshimet hormonale gjatë menopauzës.
Studimi gjithashtu theksoi rëndësinë e aktivitetit fizik. Personat më pak aktivë kishin më shumë yndyrë të fshehur dhe më pak masë muskulore.
Ekspertët rekomandojnë ushtrime aerobike dhe forcim muskujsh të paktën disa herë në javë për të ruajtur një përbërje të shëndetshme trupore.
Sipas specialistëve, këto rezultate tregojnë se cilësia e muskujve është po aq e rëndësishme sa pesha trupore për ruajtjen e shëndetit të zemrës dhe metabolizmit. /Gazeta Shneta/