Një studim i ri nga Universiteti i Kalifornisë në San Francisko sugjeron se psilocibina, një substancë psikedelike që gjendet në kërpudhat “magjike”, mund të shkaktojë ndryshime afatgjata në funksionin dhe strukturën e trurit, duke ndikuar pozitivisht edhe në shëndetin mendor.
Studiuesit analizuan 28 të rritur të shëndetshëm që nuk kishin përdorur më parë substanca psikedelike.
Ata morën një dozë të ulët dhe më pas një dozë të lartë psilocibine, ndërsa u monitoruan përmes skanimeve të trurit para, gjatë dhe pas përdorimit.
Rezultatet treguan se doza e lartë solli ndryshime të dukshme në aktivitetin e trurit, lidhjet nervore dhe gjendjen psikologjike të pjesëmarrësve, shkruan burimi Medical News Today transmeton Gazeta Shneta.
Shumë prej tyre raportuan përvoja të pazakonta të vetëdijes, si dhe përmirësim të humorit, rritje të mirëqenies dhe fleksibilitet më të madh në të menduar.
Studiuesit vunë re një rritje të “entropisë së trurit”, një tregues që lidhet me kompleksitetin e aktivitetit cerebral dhe aftësinë për të ndryshuar modelet e mendimit.
Ky ndryshim u shoqërua me rritje të vetëdijes dhe përmirësim të gjendjes mendore deri në katër javë pas trajtimit.
Gjithashtu u identifikuan ndryshime në lidhjet strukturore të trurit, të cilat mund të tregojnë për një formë të “neuroplasticitetit” – aftësinë e trurit për t’u riorganizuar dhe përshtatur.
Ekspertët theksojnë se këto gjetje mund të kenë rëndësi për trajtimin e depresionit dhe ankthit, veçanërisht në rastet kur terapitë standarde nuk funksionojnë.
Megjithatë, ata theksojnë se nevojiten studime të mëtejshme për të kuptuar plotësisht efektet dhe sigurinë e psilocibinës. /Gazeta Shneta/