Organizata Botërore e Shëndetësisë ka ngritur shqetësimin për përdorimin në rritje të qeseve me nikotinë, duke paralajmëruar se këto produkte po promovohen në mënyrë “agresive” te të rinjtë dhe fëmijët.
Në një raport të ri, OBSH thekson se qeset me nikotinë mund të krijojnë varësi të lartë dhe kërkon rregullim më të rreptë të të gjitha produkteve që përmbajnë nikotinë, shkruan Euronews Health përcjell Gazeta Shneta.
Qeset me nikotinë janë produkte të vogla që vendosen në gojë për të çliruar nikotinë dhe zakonisht përmbajnë aromatizues, ëmbëlsues dhe substanca të tjera kimike.
Sipas raportit, tregu global i këtyre produkteve është rritur ndjeshëm. Vetëm gjatë vitit 2024 janë shitur mbi 23 miliardë njësi, që paraqet rritje prej më shumë se 50 për qind krahasuar me vitin paraprak.
OBSH vlerëson se përdorimi i tyre është rritur veçanërisht te grupmoshat e reja, sidomos në Shtetet e Bashkuara të Amerikës dhe disa vende evropiane si Gjermania, Polonia dhe Suedia.
Raporti thekson se kompanitë po përdorin rrjete sociale, influencerë dhe reklama digjitale për t’i promovuar këto produkte te të rinjtë, shpesh duke i paraqitur si produkte “diskrete” që mund të përdoren pa u vërejtur nga prindërit apo mësimdhënësit.
Një tjetër shqetësim lidhet me aromat e shumta të këtyre produkteve, përfshirë shijet me fruta, karamele, çamçakëz apo pije alkoolike, të cilat sipas OBSH-së janë veçanërisht tërheqëse për fëmijët dhe adoleshentët.
Përfaqësuesi i OBSH-së, Vinayak Prasad, tha se përdorimi i qeseve me nikotinë po përhapet më shpejt sesa po ecin rregulloret ligjore.
“Qeveritë duhet të veprojnë tani me masa të forta dhe të bazuara në prova”, tha ai.
OBSH u ka bërë thirrje shteteve të ndalojnë reklamat dhe promovimin e këtyre produkteve, të kufizojnë aromatizuesit dhe të forcojnë verifikimin e moshës për të parandaluar qasjen e të rinjve në to.