Ndalimet dhe kufizimet ndaj ndërprerjes së shtatzënisë në disa shtete amerikane po ndikojnë negativisht edhe në trajtimin e grave që përjetojnë dështim të shtatzënisë, paralajmëron një studim i ri i publikuar në revistën shkencore “JAMA”.
Hulumtimi, i realizuar nga studiues të Universitetit të Shëndetit dhe Shkencës në Oregon, analizoi të dhënat e mbi 123 mijë grave që kishin humbur shtatzëninë në javët e para, gjatë periudhës 2018–2024.
Rezultatet tregojnë se në shtetet ku ndërprerja e shtatzënisë është ndaluar ose kufizuar, pacientet po marrin më pak trajtim sipas standardeve mjekësore dhe po detyrohen më shpesh të presin që dështimi i shtatzënisë të ndodhë natyrshëm, pa ndërhyrje mjekësore.
Sipas studiuesve, përdorimi i trajtimit me barna është ulur ndjeshëm pas rrëzimit të vendimit historik “Roe kundër Wade”, ndërsa është rritur përdorimi vetëm i barit misoprostol, në vend të kombinimit më efektiv me mifepristone. Ekspertët paralajmërojnë se kjo mund të rrisë komplikimet shëndetësore dhe të zgjasë vuajtjen fizike e emocionale të grave që humbin shtatzëninë.
Drejtoresha e Qendrës për Shëndet Riprodhues në Oregon, Maria Rodriguez, tha se kufizimet ndaj ndërprerjes së shtatzënisë po krijojnë pasoja më të gjera sesa ishte parashikuar.
“Pacientet po presin më gjatë për trajtim dhe kanë më pak zgjedhje”, deklaroi ajo.
Studime të tjera të publikuara së fundmi kanë paralajmëruar gjithashtu për rritje të komplikimeve serioze gjatë shtatzënisë dhe rritje të vdekshmërisë së foshnjave në shtetet me kufizime të ashpra ndaj ndërprerjes së shtatzënisë.