Qendra Kosovare për Studime Gjinore (QKSGj) prezantoi raportin për ekonominë e kujdesit në Kosovë në kuadër të projektit “TransformCare”, duke theksuar se sistemi i kujdesit në vend mbetet i fragmentuar, i nënfinancuar dhe me zbatim të dobët të legjislacionit ekzistues.
Në konferencë u bë e ditur se barra kryesore e kujdesit të papaguar vazhdon të bie mbi gratë, duke ndikuar në pjesëmarrjen e tyre në tregun e punës dhe mirëqenien ekonomike. Sipas të dhënave të prezantuara, gratë kryejnë 65 deri në 75 për qind të punës së papaguar të kujdesit dhe punëve të shtëpisë.
Drejtoresha ekzekutive e QKSGj-së, Luljeta Demolli, tha se Kosova ka nevojë për reforma të thella në sektorin e kujdesit, me fokus në lehtësimin e barrës që mbajnë gratë në familje.
Ndërkaq, shefja e zyrës së UN Women në Kosovë, Vlora Tuzi-Nushi, theksoi se ekonomia e kujdesit duhet të shihet si mundësi për investim publik dhe zhvillim ekonomik.
Koordinatori për zhvillim i United Nations, Stephen O’Malley, vlerësoi raportin si një dokument të rëndësishëm për zhvillimin e kapitalit njerëzor në Kosovë.
Sipas raportit, kujdesi për fëmijët dhe të moshuarit mbetet nën standardet evropiane, ndërsa mungesa e financimit dhe e shërbimeve adekuate vazhdon të paraqesë sfidë për sistemin social në vend./EO/