Shumë amerikanë ende nuk po e kuptojnë seriozisht rrezikun që vjen nga ekspozimi i përditshëm në diell, ndërsa konfuzioni dhe dezinformatat rreth kremrave kundër diellit po i ekspozojnë ata më shumë ndaj melanomës – formës më të rrezikshme të kancerit të lëkurës.
Sipas një ankete të realizuar nga Melanoma Research Alliance, edhe pse 80 për qind e qytetarëve e dinë se rrezet e diellit dëmtojnë lëkurën dhe rrisin rrezikun për kancer të lëkurës, më pak se një e treta praktikojnë mbrojtje të përditshme nga dielli.
Studimi tregon se vetëm gjysma e të anketuarve përdorin rregullisht krem kundër diellit kur qëndrojnë jashtë, ndërsa vetëm 38 për qind e aplikojnë atë gjatë aktiviteteve të zakonshme ditore, si ecja apo vozitja. Shumë persona nuk e kuptojnë se edhe ekspozimet e shkurtra ndaj rrezeve UV mund të grumbullohen me kalimin e kohës dhe të shkaktojnë dëmtime serioze në lëkurë.
Ekspertët thonë se rrjetet sociale kanë ndikuar në përhapjen e frikës ndaj përbërësve të kremrave kundër diellit. Rreth 60 për qind e pjesëmarrësve në anketë shprehën shqetësime se këto produkte mund të jenë të dëmshme për shëndetin. Megjithatë, specialistët theksojnë se kremrat kundër diellit të aprovuara nga autoritetet shëndetësore konsiderohen të sigurta dhe efektive.
Sipas dermatologëve, përdorimi i kremit me spektër të gjerë mbrojtjeje dhe SPF 30 ose më shumë është një nga mënyrat më efektive për të parandaluar melanomën dhe dëmtimet nga dielli. Ata rekomandojnë gjithashtu përdorimin e kapelave, syzeve dhe shmangien e ekspozimit të gjatë në orët me rrezatim të lartë.
Anketa nxori në pah edhe disa keqkuptime të tjera lidhur me kancerin e lëkurës. Një pjesë e të anketuarve besojnë se personat me lëkurë më të errët nuk kanë nevojë për krem kundër diellit, megjithëse ekspertët paralajmërojnë se melanoma mund të prekë çdo person, pavarësisht ngjyrës së lëkurës.
Ndërkohë, rastet me melanomë pritet të rriten me më shumë se 10 për qind gjatë vitit 2026, duke shtuar thirrjet e mjekëve për ndërgjegjësim më të madh dhe mbrojtje të vazhdueshme nga dielli.