Shkurtimet e mëdha të ndihmës humanitare nga shtetet donatore gjatë vitit 2025 po ndikojnë drejtpërdrejt në përballimin e krizave shëndetësore dhe humanitare në shumë vende të botës.
Sipas raportimeve ndërkombëtare, një nga shembujt më shqetësues është shpërthimi i Ebolës në Republika Demokratike e Kongos, ku deri më tani janë raportuar mbi 900 raste të dyshuara dhe rreth 220 viktima të dyshuara.
Organizata Botërore e Shëndetësisë e shpalli më 16 maj situatën emergjencë ndërkombëtare të shëndetit publik.
Organizatat humanitare paralajmërojnë se shkurtimi i fondeve ka dobësuar rëndë sistemet e mbikëqyrjes epidemiologjike dhe kapacitetet e reagimit ndaj epidemive.
Drejtori i Oxfam në Kongo, Manenji Mangundu, deklaroi se vendi po përballet me një krizë humanitare të rënduar nga konfliktet dhe reduktimi i ndihmave ndërkombëtare.
Ndërkohë, edhe International Rescue Committee paralajmëroi se mungesa e fondeve ka lënë shumë qendra shëndetësore pa pajisje mbrojtëse dhe pa kapacitet të mjaftueshëm për reagim të shpejtë.
Sipas të dhënave të Organizata për Bashkëpunim dhe Zhvillim Ekonomik, ndihma zyrtare për zhvillim nga vendet donatore ra nga 229 miliardë dollarë në vitin 2023 në 165 miliardë dollarë gjatë vitit 2025.
Rënia më e madhe është regjistruar në Shtetet e Bashkuara të Amerikës, ku ndihma është ulur me 56.9 për qind krahasuar me vitin paraprak, duke përbërë reduktimin më të madh të regjistruar ndonjëherë nga një shtet donator.
Ndër donatorët më të mëdhenj vazhdojnë të mbeten Gjermania, Shtetet e Bashkuara të Amerikës, Britania e Madhe, Japonia dhe Franca.
Ndërsa për nga përqindja e të ardhurave kombëtare të dedikuara për ndihma humanitare, në krye renditen Norvegjia, Luksemburgu, Suedia, Danimarka dhe Holanda.
Po ashtu, Bashkimi Evropian dhe shtetet anëtare mbeten donatori më i madh humanitar në botë, duke mbuluar rreth 40 për qind të ndihmës globale humanitare gjatë vitit 2025.