Mjekët në Britaninë e Madhe kanë paralajmëruar se rrjetet sociale po përbëjnë një rrezik serioz për shëndetin e fëmijëve dhe adoleshentëve, duke i krahasuar ndikimet e tyre me ato të duhanpirjes.
Paralajmërimi vjen nga Academy of Medical Royal Colleges, e cila përfaqëson 23 institucione mjekësore në Mbretërinë e Bashkuar dhe Irlandë, shkruan Reuters, transmeton Gazeta Shneta.
Në raportin e dorëzuar qeverisë britanike, ekspertët theksojnë se ekspozimi i pakontrolluar ndaj platformave digjitale po shkakton pasoja të dukshme në shëndetin mendor dhe fizik të të rinjve.
Sipas mjekëve, më shumë se gjysma e 132 të anketuarve kanë raportuar se çdo javë trajtojnë të paktën një rast të lidhur me dëmtime që lidhen me përdorimin e rrjeteve sociale dhe pajisjeve digjitale. Këto përfshijnë ankth, depresion, çrregullime gjumi, si dhe lëndime fizike nga imitimi i sfidave të rrezikshme online.
Raporti ngre gjithashtu shqetësime për ekspozimin e fëmijëve ndaj përmbajtjeve të dhunshme, urrejtjes dhe materialeve që mund të ndikojnë negativisht në sjelljen dhe zhvillimin e tyre emocional.
Ekspertët argumentojnë se platformat digjitale, përmes algoritmeve dhe funksioneve që krijojnë varësi, po rrisin kohën e përdorimit dhe po ndikojnë në gjumin, përqendrimin dhe shëndetin mendor të fëmijëve.
Në përgjigje të këtyre shqetësimeve, qeveria britanike po shqyrton masa të reja, përfshirë ndalimin e rrjeteve sociale për nën 16 vjeç, kufizime të kohës së përdorimit dhe ndryshime në dizajnin e platformave për të reduktuar varësinë.
Ekspertët theksojnë se, megjithëse rrjetet sociale mund të kenë edhe përfitime, përdorimi i pakontrolluar i tyre mund të përbëjë një nga sfidat më të mëdha të shëndetit publik për brezin e ri. /Gazeta Shneta/