Instituti Kombëtar i Shëndetësisë Publike të Kosovës ka njoftuar se nga 16 prilli deri më 1 qershor 2026 janë konfirmuar gjithsej 25 raste të fruthit në vend, ndërsa vetëm gjatë javës së fundit janë raportuar pesë raste të reja.
Sipas të dhënave të IKShPK-së, numri më i madh i rasteve është regjistruar në Ferizaj me tetë raste, pasuar nga Prishtina me gjashtë raste dhe Kaçaniku me pesë raste, transmeton Gazeta Shneta.
Nga një rast është raportuar në Deçan, Fushë Kosovë, Gjilan, Lipjan, Obiliq dhe Shtime.
IKShPK ka bërë thirrje që çdo person që shfaq simptoma të dyshimta të fruthit, si temperaturë të lartë, skuqje apo ndryshime në lëkurë, kollë dhe rrufë, të kërkojë menjëherë ndihmë mjekësore në institucionet më të afërta shëndetësore.
Sipas IKShPK-së, vaksinimi mbetet masa më efektive dhe më e sigurt për parandalimin e fruthit, mbrojtjen e personave të pavaksinuar dhe ruajtjen e shëndetit publik./Gazeta Shneta/