Spitali i Përgjithshëm i Gjakovës ka nisur këtë javë ofrimin e skriningut neonatal për të gjitha foshnjat e porsalindura, një shërbim që synon zbulimin e hershëm të disa sëmundjeve të rënda që mund të ndikojnë në zhvillimin dhe shëndetin e fëmijëve.
Përmes këtij testi, do të mundësohet identifikimi i hershëm i pesë sëmundjeve të rëndësishme: hipotiroidizmit kongjenital, fenilketonurisë (PKU), fibrozës cistike, galaktozemisë dhe atrofisë muskulore spinale (SMA).
Sipas njoftimit të spitalit, zbulimi i hershëm i këtyre sëmundjeve është me rëndësi të veçantë, pasi mundëson fillimin e trajtimit në kohë dhe rrit mundësitë për një zhvillim sa më të shëndetshëm të fëmijëve.
Skriningu neonatal konsiderohet një nga masat më efektive të kujdesit shëndetësor për të porsalindurit, pasi ndihmon në diagnostikimin e hershëm të çrregullimeve që në fazat e para të jetës, shpeshherë para shfaqjes së simptomave.