Obeziteti është një nga sfidat më të mëdha shëndetësore të kohës sonë. Për dekada të tëra, pesha trupore dhe indeksi i masës trupore (BMI) kanë qenë mjetet kryesore për vlerësimin e obezitetit. Megjithatë, shkenca moderne po tregon se pesha në vetvete nuk e tregon gjithë historinë.
Pse pesha nuk mjafton? Gazeta Shneta ka realizuar një intervistë me endokrinologun Dr. Fatbardh Ramadani në MedPro Clinic, i cili thotë se dy persona mund të kenë të njëjtën peshë dhe të njëjtin BMI, por të kenë përbërje trupore krejtësisht të ndryshme.
Njëri mund të ketë masë muskulore të lartë dhe yndyrë të ulët, ndërsa tjetri mund të ketë yndyrë të tepërt dhe masë muskulore të reduktuar.
Prandaj, sot fokusi po zhvendoset nga pyetja: “Sa peshon?” tek pyetja: “Nga çfarë përbëhet trupi yt?”
Gazeta Shneta: Çfarë është All Body DEXA?
Dr. Ramadani: All Body DEXA është një metodë e avancuar që analizon përbërjen e trupit me saktësi të lartë. Përveç densitetit kockor, ajo mat:
- Përqindjen totale të yndyrës trupore;
- Masën muskulore;
- Shpërndarjen rajonale të yndyrës dhe muskujve;
- Yndyrën viscerale (rreth organeve të brendshme);
- Simetrinë e masës muskulore ndërmjet gjymtyrëve.
Gazeta Shneta: Çka është yndyra viscerale – armiku i fshehur?
Dr. Ramadani: Jo e gjithë yndyra është e njëjtë. Yndyra viscerale, e cila grumbullohet rreth organeve të barkut, lidhet ngushtë me:
- Diabetin tip 2;
- Hipertensionin;
- Sëmundjet kardiovaskulare;
- Mëlçinë yndyrore.
Një person mund të duket relativisht normal në peshë, por të ketë nivele të larta të yndyrës viscerale dhe rrezik të shtuar metabolik.
Gazeta Shneta: Çka nënkupton obeziteti me mungesë muskulore?
Dr. Ramadani: Një koncept gjithnjë e më i rëndësishëm është “obeziteti sarkopenik” – situatë ku individi ka yndyrë të tepërt, por masë muskulore të ulët.
Këta pacientë shpesh:
- Kanë metabolizëm më të ngadalshëm;
- Humbin më vështirë peshë;
- Kanë rrezik më të lartë për diabet dhe paaftësi fizike.
DEXA mund ta identifikojë këtë problem shumë më herët se metodat tradicionale.
Gazeta Shneta: Si ndryshon DEXA trajtimin?
Dr. Ramadani: Në të kaluarën, suksesi matej vetëm me kilogramët e humbur. Sot, qëllimi është:
- Të reduktohet yndyra trupore;
- Të ruhet ose rritet masa muskulore;
- Të zvogëlohet yndyra viscerale.
Kjo lejon krijimin e programeve të personalizuara të ushqyerjes, aktivitetit fizik dhe trajtimit medikamentoz.
Gazeta Shneta: Sa është i rëndësishëm monitorimi i terapive moderne?
Dr. Ramadani: Me përdorimin në rritje të barnave si semaglutide dhe tirzepatide, bëhet shumë e rëndësishme të dihet nëse pacienti po humb yndyrë apo po humb edhe masë muskulore. DEXA ofron këtë informacion me saktësi të lartë. /Gazeta Shneta/