Një ndërhyrje e suksesshme kirurgjikale e realizuar në Klinikën e Otorinolaringologjisë (ORL) në Qendrën Klinike Universitare të Kosovës (QKUK) i ka rikthyer dëgjimin një pacienteje që për 18 vjet ishte përballur me humbje të rëndë të dëgjimit dhe vështirësi në komunikim.
Sipas njoftimit të QKUK-së, pacientja me inicialet R.H. (1981) kishte kërkuar trajtim në qendra të ndryshme shëndetësore brenda dhe jashtë vendit, por pa arritur rezultatet e dëshiruara, përcjell Gazeta Shneta.
Pas vlerësimeve të hollësishme klinike, ekzaminimeve diagnostike dhe analizës multidisiplinare të rastit, mjekët e Klinikës së ORL-së vendosën që pacientja t’i nënshtrohej ndërhyrjes kirurgjikale.
Operacioni u realizua nga ekipi mjekësor i Klinikës së Otorinolaringologjisë, nën udhëheqjen e dr. Refki Krasniqit, me mbështetjen e ekipit të anesteziologëve të udhëhequr nga dr. Arian Ademi.
Pas trajtimit dhe qëndrimit disa ditor në klinikë, pacientja u lirua në gjendje të mirë shëndetësore. Testet e dëgjimit të kryera pas operacionit treguan përmirësim të dukshëm të dëgjimit dhe të aftësisë për komunikim.
QKUK ka bërë të ditur se në Klinikën e ORL-së po realizohen me sukses ndërhyrje kirurgjikale të veshit, duke u mundësuar shumë pacientëve përmirësimin e dëgjimit dhe cilësisë së jetës.