Një studim i ri ka sjellë lajme inkurajuese për gratë që kanë përdorur pa dashje barna të grupit GLP-1 gjatë fazave të hershme të shtatzënisë. Sipas gjetjeve, ekspozimi në tremujorin e parë nuk duket të lidhet me rritje të konsiderueshme të rrezikut për komplikime serioze tek nëna apo fetusi.
Barnat GLP-1, të përdorura gjerësisht për menaxhimin e peshës trupore dhe kontrollin e nivelit të sheqerit në gjak, po bëhen gjithnjë e më të zakonshme te gratë në moshë riprodhuese. Megjithëse udhëzimet aktuale rekomandojnë ndërprerjen e tyre para shtatzënisë, në praktikë ndodhin raste kur gratë mbeten shtatzëna pa e ditur ndërsa janë ende duke i përdorur, shkruan burimi Health Day transmeton Gazeta Shneta.
Studimi, i publikuar në revistën shkencore “Annals of Internal Medicine”, analizoi të dhënat e sigurimeve shëndetësore të afro 3,600 grave të moshës 16 deri në 55 vjeç. Studiuesit krahasuan shtatzënitë ku përdorimi i barnave GLP-1 vazhdoi në tremujorin e parë me ato ku trajtimi ishte ndërprerë.
Ata shqyrtuan një sërë rezultatesh, përfshirë humbjen e shtatzënisë, rritjen jonormale të fetusit dhe keqformimet e mëdha kongjenitale. Në shumicën e rasteve, rreziqet rezultuan të ngjashme mes dy grupeve dhe nuk u identifikua ndonjë rritje e qartë e komplikimeve te gratë që vazhduan përdorimin e barnave.
Për shembull, përqindja e shtatzënive që nuk përfunduan me lindje të gjallë ishte 29.7% te gratë që vazhduan trajtimin, krahasuar me 27.1% te ato që e ndërprenë.
Megjithatë, autorët theksojnë se disa rezultate, veçanërisht ato që lidhen me keqformimet e rralla kongjenitale dhe peshën e ulët në lindje, kërkojnë studime shtesë. Sipas tyre, nevojiten kërkime më të gjera për të përcaktuar me saktësi sigurinë e barnave GLP-1 gjatë shtatzënisë. /Gazeta Shneta/