Gjatë Javës së Dhurimit të Gjakut, e cila u shënua nga 11 deri më 18 qershor, gjithsej 120 qytetarë kanë dhuruar gjak në Njësinë e Transfuzionit të Gjakut pranë Spitalit të Përgjithshëm në Pejë.
Sipas të dhënave të publikuara nga institucioni, aktivitetet janë zhvilluar në kuadër të fushatës vjetore për ndërgjegjësimin mbi rëndësinë e dhurimit vullnetar të gjakut dhe sigurimin e rezervave për nevojat spitalore.
Nga spitali i Pejës, theksojnë se nevojat për gjak janë të vazhdueshme gjatë gjithë vitit, duke bërë të domosdoshëm dhurimin e rregullt dhe vullnetar nga qytetarët.
Dhurimi i gjakut mbetet një nga mënyrat kryesore për të mbështetur trajtimin e pacientëve në raste urgjente, ndërhyrje kirurgjikale dhe gjendje të tjera mjekësore që kërkojnë transfuzion.
Fushata e Javës së Dhurimit të Gjakut organizohet çdo vit me qëllim rritjen e ndërgjegjësimit publik dhe sigurimin e furnizimit të qëndrueshëm me gjak në institucionet shëndetësore.