Spitali i Përgjithshëm në Pejë ka bërë të ditur se gjatë javës së kaluar në këtë institucion kanë lindur 31 foshnje.
Sipas të dhënave të publikuara nga spitali, nga numri i përgjithshëm i të porsalindurve, 18 kanë qenë djem dhe 13 vajza.
Gjatë së njëjtës periudhë, në Spitalin e Pejës janë realizuar 2.841 vizita specialistike, ndërsa janë pranuar 265 pacientë për trajtim spitalor.
Mesatarisht, 175 pacientë kanë qenë të hospitalizuar çdo ditë.
Shërbimi laboratorik ka kryer 16.479 analiza për 1.289 pacientë, ndërsa në sallat operative janë realizuar 65 ndërhyrje kirurgjikale.
Po ashtu, janë ofruar 225 trajtime me dializë për pacientët që kanë pasur nevojë për këtë shërbim.
Sa i përket shërbimeve diagnostike, gjatë javës janë kryer 636 ekzaminime me rëntgen, 271 ultrazëra, 91 rezonanca magnetike (MRI), 29 ehokardiografi, 15 teste ergometrike, 17 gastroskopi dhe 12 kolonoskopi.
Në kuadër të shërbimeve rehabilituese, janë realizuar edhe 200 trajtime fiziatrike për pacientët që kanë pasur nevojë për rikuperim dhe kthim në aktivitetet e përditshme./Gazeta Shneta/