Suplementet me vaj peshku, të cilat përdoren gjerësisht për ruajtjen e shëndetit të trurit, mund të mos ofrojnë përfitimet e pritura në parandalimin e sëmundjes së Alzheimerit, sugjeron një studim i ri i publikuar në revistën shkencore EBioMedicine.
Hulumtimi ka përfshirë 365 persona të moshës 55 deri në 80 vjeç, të cilët konsideroheshin me rrezik të shtuar për zhvillimin e Alzheimerit. Pjesëmarrësit u ndoqën për dy vjet dhe morën ose një dozë të lartë ditore të omega-3, ose placebo.
Studiuesit analizuan nëse acidi dokosaheksaenoik (DHA), një nga përbërësit kryesorë të omega-3, arrinte në tru. Rezultatet treguan se nivelet e DHA-së u rritën me rreth 17 për qind pas gjashtë muajsh trajtim.
Megjithatë, kjo rritje nuk u shoqërua me përmirësime të kujtesës apo funksioneve njohëse.
Testet e kujtesës dhe skanimet e trurit nuk treguan ndonjë avantazh te personat që përdorën suplementet me vaj peshku krahasuar me grupin që mori placebo. Gjithashtu, suplementet nuk ngadalësuan tkurrjen e zonave të trurit që lidhen me sëmundjen e Alzheimerit.
Sipas autorëve të studimit, rezultatet sugjerojnë se suplementet me vaj peshku nuk përbëjnë një strategji efektive për parandalimin e formës më të zakonshme të demencës.
Studiuesit theksojnë se faktorët më të rëndësishëm për uljen e rrezikut të Alzheimerit mbeten aktiviteti i rregullt fizik, gjumi cilësor dhe një regjim ushqimor i balancuar.