Kompania Rajonale e Ujësjellësit “Prishtina” u bën thirrje qytetarëve për përdorim racional dhe të përgjegjshëm të ujit të pijshëm gjatë muajve të verës. Edhe pse nivelet e ujit në liqenet akumuluese janë të mira, rritja e konsumit dhe keqpërdorimet po rrezikojnë furnizimin stabil, thonë zyrtarët.
Rritja e temperaturave ka sjellë edhe rritjen e menjëhershme të konsumit të ujit në rajonin e Prishtinës. Zëdhënësja e Ujësjellësit, Arjeta Mjeku, përmes Radio Kosovës, u ka bërë apel qytetarëve që të ndërpritet përdorimi i ujit të pijshëm për qëllime të tjera si për ujitje apo çfarëdo forme tjetër e keqpërdorimit.
”Është e rëndësishme që secili prej nesh të kontribuoj në ruajtjen e ujit duke shmangur shpenzimet e panevojshme dhe përdorimin e tij për aktivitete që nuk janë të destinuara. I lutim konsumatorët që të evitojnë ujitjen e oborreve, kopshteve sipërfaqeve të gjelbra me ujë, larjen e trotuareve, rrugëve dhe hapësirave tjera publike apo private me ujë të pijshëm, mbushjen e pishinave dhe rezervuarëve privat , lënien e çezmave të hapura pa nevojë dhe çdo formë tjetër të keqpërdorimit apo shpenzimit të panevojshëm të ujit”, tha ajo.
Sipas KRU “Prishtina”, ankesat për mungesë uji në disa pika të larta lidhen edhe me mosrespektimin e rregullave teknike nga vetë ndërtesat kolektive. Ujësjellësi ka obligim ligjor të sigurojë shtypjen e ujit deri në katin e pestë, ndërsa katet më të larta duhet të pajisen me pompa private.
Por, sfidë më e madhe mbetet kyçja ilegale. Inspektorët në terren po ndeshen me dhjetëra raste abuzimi çdo ditë, thotë Mjeku.
“Forma më e rëndë e keqpërdorimit të ujit është kyçja ilegale. Inspektorët tanë në terren brenda një dite identifikojnë rreth 10 deri në 15 raste të tilla, që rëndojnë dukshëm furnizimin. Liqenet i kemi në gjendje të mirë dhe furnizimi është stabil, përveç disa pikave ku kemi ankesa”, shtoi ajo.
Ujësjellësi rikujton se furnizimi i rregullt për familjet, bizneset dhe institucionet mund të garantohet vetëm përmes bashkëpunimit dhe ndërgjegjësimit të të gjithë qytetarëve.