Kombet e Bashkuara pritet të shqyrtojnë statusin ligjor të nikotinës në nivel global, një proces që mund të çojë në një votim ndërkombëtar për kufizimin ose ndalimin e saj në vitet e ardhshme. Debati është nxitur nga përhapja e shpejtë e produkteve të reja, si cigaret elektronike dhe qeskat me nikotinë, të cilat kanë fituar popullaritet të madh sidomos te të rinjtë.
Dëmet e cigareve tradicionale janë të padiskutueshme. Pirja e duhanit vazhdon të jetë shkaku kryesor i vdekjeve që mund të parandalohen në mbarë botën. Për këtë arsye, shumë shtete kanë vendosur kufizime të ashpra ose ndalime për produktet e duhanit, transmeton Gazeta Shneta.
Sipas editorialit të burimit Guardian, megjithatë, nikotina sintetike paraqet një sfidë më të ndërlikuar. Nga shqetësimet kryesore është fakti se tregu i produkteve me nikotinë është zhvilluar më shpejt sesa rregulloret që duhej ta kontrollonin.
Sipas të dhënave të Organizatës Botërore të Shëndetësisë (OBSh), fëmijët dhe adoleshentët kanë dukshëm më shumë gjasa të përdorin cigare elektronike sesa të rriturit. Gjithashtu, disa produkte përmbajnë substanca të dëmshme, përfshirë metale të rënda.
Ekspertët argumentojnë se një ndalim i plotë i nikotinës do të ishte masë e tepruar, por nuk ka arsye që produktet me nikotinë të jenë lehtësisht të aksesueshme. Në vend të kësaj, ata propozojnë kufizime më të forta për reklamimin, ekspozimin në dyqane, aromat që tërheqin fëmijët dhe shitjen e produkteve të reja që shmangin rregullat ekzistuese.
Sipas tyre, nikotina mund të mos jetë po aq e dëmshme sa duhani, por mungojnë ende prova të mjaftueshme për efektet afatgjata të përdorimit të saj.
Për këtë arsye, qeveritë duhet të mbajnë një qasje të kujdesshme dhe të kontrollojnë më rreptësisht produktet që krijojnë varësi, veçanërisht kur ato synojnë brezat e rinj. /Gazeta Shneta/