Agjencia e Kombeve të Bashkuara për HIV/AIDS (UNAIDS) ka paralajmëruar se vendimi i administratës së presidentit amerikan Donald Trump për të ndërprerë financimin e programeve kundër HIV/AIDS në Afrikën e Jugut mund të ketë pasoja të rënda për shëndetin publik dhe të rrezikojë jetën e mijëra njerëzve.
Shtetet e Bashkuara kanë vendosur të tërheqin të gjitha fondet për përgjigjen ndaj HIV/AIDS në Afrikën e Jugut përmes Programit Emergjent të Presidentit për Ndihmën ndaj AIDS-it (PEPFAR), i cili ka kontribuar me rreth 400 milionë dollarë në vit në luftën kundër sëmundjes.
Drejtoresha ekzekutive e UNAIDS, Winnie Byanyima, tha se ndërprerja e këtij financimi rrezikon të zhbëjë përparimin e arritur ndër vite në parandalimin e infeksioneve të reja dhe në mbështetjen e komuniteteve më të cenueshme.
“Ju lutem mos i hiqni këto fonde, sepse po hiqni jetë,” deklaroi ajo para një takimi të OKB-së, duke theksuar se mbështetja amerikane ka qenë jetike për programet e parandalimit, testimit dhe shërbimet për grupet me rrezik më të lartë.
Sipas UNAIDS, PEPFAR ka mbuluar rreth 17 për qind të financimit total të përgjigjes ndaj HIV/AIDS në Afrikën e Jugut, vendi që ka numrin më të madh të personave që jetojnë me HIV në botë, me mbi tetë milionë të prekur.
Departamenti Amerikan i Shtetit tha se tërheqja e fondeve është pjesë e një procesi gradual, duke e lidhur vendimin me mosplotësimin e disa kërkesave politike të administratës amerikane nga autoritetet e Pretorias.
Nga ana tjetër, qeveria e Afrikës së Jugut ka hedhur poshtë pretendimet amerikane dhe ka deklaruar se po punon prej kohësh për një plan vetëfinancimi të programeve kundër HIV/AIDS. Megjithatë, ekspertët paralajmërojnë se zëvendësimi i fondeve të humbura, veçanërisht për programet e parandalimit, do të jetë një sfidë e madhe për vendin.