Rritja e temperaturave dhe ngrohja e ujërave detare po favorizojnë përhapjen e baktereve që mund të shkaktojnë infeksione të rënda dhe potencialisht fatale, paralajmërojnë ekspertët e shëndetit publik.
Sipas të dhënave të publikuara nga autoritetet shëndetësore dhe të përmbledhura nga Euronews, dy bakteret që po monitorohen më nga afër janë Vibrio vulnificus, i cili gjendet në ujërat detare, dhe Streptococcus pyogenes i grupit A, që transmetohet nga një person te tjetri.
Megjithëse shpesh përshkruhen si “baktere mishngrënëse”, ekspertët sqarojnë se ky është një emërtim jo i saktë shkencërisht. Këto baktere mund të shkaktojnë fasciit nekrotizues, një infeksion i rëndë që shkatërron me shpejtësi indet e buta të trupit dhe, në raste të caktuara, mund të çojë deri në amputim të gjymtyrëve.
Vibrio vulnificus infekton njerëzit kur plagët e hapura bien në kontakt me ujë detar të kontaminuar ose pas konsumimit të butakëve të pagatuar, veçanërisht gocave të detit. Rreziku është më i madh për personat me sëmundje të mëlçisë, diabet, sistem imunitar të dobësuar dhe të moshuarit. Sipas Qendrave Amerikane për Kontrollin dhe Parandalimin e Sëmundjeve (CDC), rreth një në pesë pacientë me infeksion të rëndë humb jetën brenda pak ditësh.
Ndërkohë, Streptococcus pyogenes përhapet përmes pikëzave të frymëmarrjes ose plagëve në lëkurë dhe, në format më të rënda, mund të shkaktojë sindromën e shokut toksik streptokoksik, e cila shoqërohet me shkallë të lartë vdekshmërie.
Të dhënat tregojnë se rastet janë shtuar në vende të ndryshme të botës. Në Shtetet e Bashkuara, që nga viti 1988 janë regjistruar mbi 2,600 infeksione dhe më shumë se 700 viktima nga Vibrio vulnificus, ndërsa në Japoni është shënuar rritje rekord e rasteve me infeksione të rënda nga Streptococcus pyogenes.
Edhe Evropa po përballet me rrezik në rritje. Pas një vere jashtëzakonisht të nxehtë në vitin 2018, numri i infeksioneve nga bakteret e gjinisë Vibrio u trefishua krahasuar me mesataren e viteve paraprake. Qendra Evropiane për Parandalimin dhe Kontrollin e Sëmundjeve (ECDC) e ka cilësuar sezonin veror të vitit 2026 si periudhë me rrezik të lartë, ndërsa Mesdheu konsiderohet një nga rajonet më të cenueshme për shkak të ngrohjes së ujërave.
Sipas studiuesve, rritja e temperaturës së detit krijon kushte më të favorshme për shumimin e këtyre baktereve dhe zgjerimin e zonave ku ato mund të mbijetojnë. Për këtë arsye, autoritetet shëndetësore u rekomandojnë personave me plagë të hapura të shmangin kontaktin me ujërat e detit në zonat me rrezik, ndërsa konsumatorët të mos konsumojnë butakë të pagatuar, veçanërisht gjatë muajve të verës.