Ekipet ndërkombëtare të kërkim-shpëtimit kanë nisur të mbërrijnë në Venezuelë për të mbështetur autoritetet në operacionet pas tërmeteve shkatërruese.
Punonjësit e shpëtimit nga Spanja janë fotografuar teksa mbërrijnë në vend, ndërsa më herët gjatë ditës u raportua edhe mbërritja e ekipeve zvicerane, shkruan BBC.
Ndërkohë, disa shtete të tjera evropiane po përgatiten ose janë tashmë në rrugë për të ofruar ndihmë. Sipas presidentes së Komisionit Evropian, Ursula von der Leyen, Italia, Çekia, Franca, Gjermania, Luksemburgu, Portugalia dhe Holanda po dërgojnë ekipe të specializuara të kërkim-shpëtimit për të ndihmuar në gjetjen e të mbijetuarve.
Edhe Mbretëria e Bashkuar ka bërë të ditur se Ekipi Ndërkombëtar i Kërkim-Shpëtimit është në gatishmëri dhe mund të dislokohet në Venezuelë nëse kërkohet.
Shefi i çështjeve humanitare i OKB-së, Tom Fletcher, deklaroi se ekipi i organizatës në Venezuelë po koordinon mbërritjen e një numri të madh ekipesh urbane të kërkim-shpëtimit nga vende të ndryshme të botës, ndërsa priten edhe grupe të tjera në ditët në vijim.
Nga ana tjetër, drejtori i Organizatës Botërore të Shëndetësisë (OBSH), Tedros Adhanom Ghebreyesus, tha se organizata ka vendosur në gatishmëri personel shtesë dhe furnizime mjekësore, për t’iu përgjigjur nevojave urgjente të të prekurve nga katastrofa.