Edhe pse salla e dytë operative në Klinikën e Kirurgjisë Torakale të Qendrës Klinike Universitare të Kosovës (QKUK) është rinovuar, ajo ende nuk është vënë në funksion për shkak të mungesës së anesteziologëve, duke kufizuar kapacitetin për kryerjen e ndërhyrjeve kirurgjikale.
Kështu ka bërë të ditur drejtori i Klinikës së Kirurgjisë Torakale, Dr. Nazmi Kolegeci, në një intervistë pë Gazetën Shneta ku tha se aktualisht klinika funksionon vetëm me një sallë operative, pavarësisht numrit të madh të pacientëve që trajtohen.
Sipas tij, lista e pritjes për operacione mbetet e konsiderueshme, megjithatë pacientët me diagnoza malinje trajtohen me prioritet.
“Lista e pritjes është goxha e madhe, por pacientët që janë të diagnostikuar me karcinomë të gjirit nuk presin. Koha prej dy deri në pesë javë shfrytëzohet për përgatitjet para operacionit, si ekzaminimet dhe konsultat me specialistët e tjerë. Kjo është periudha e nevojshme edhe për përgatitjen psikologjike të pacientes”, tha Dr. Kolegeci.
Ai shpjegon se pacientët që presin më gjatë janë ata me tumore që nuk paraqesin urgjencë të menjëhershme.
“Numri i pacientëve që presin nuk është i vogël, por bëhet fjalë për raste të tumoreve të gjirit ose tumoreve torakale që nuk kanë urgjencë. Prioritet kanë rastet që duhet të trajtohen menjëherë, ndërsa të tjerët, për fat të keq, duhet të presin”, u shpreh ai.
Megjithëse klinika, sipas tij, ka numër të mjaftueshëm kirurgësh për të kryer ndërhyrje të tilla, kapacitetet kufizohen nga mungesa e sallave funksionale.
“Ne kemi kirurgë të mjaftueshëm, por aktualisht disponojmë vetëm me një sallë operative. Kjo është e pamjaftueshme për ta përballuar fluksin e pacientëve që vijnë në klinikën tonë”, deklaroi drejtori.
Ai bëri të ditur se salla e dytë operative është renovuar gjatë vitit të kaluar, por ende nuk ka nisur punën.
“Salla e dytë është renovuar, por për shkak të mungesës së anesteziologëve nuk kemi pasur mundësi ta funksionalizojmë. Megjithatë, jemi në rrugë të mirë dhe presim që në muajt e ardhshëm ajo të vihet në funksion”, tha Dr. Kolegeci.
Përveç mungesës së anesteziologëve, drejtori përmendi edhe sfida të tjera me të cilat përballet klinika.
“Objekti i Klinikës së Kirurgjisë Torakale është mjaft i vjetër dhe ka nevojë për investime të mëdha, pasi nuk i plotëson të gjitha standardet bashkëkohore. Një tjetër problem është mungesa e infermierëve. Nuk është e lehtë as për ne dhe as për pacientët kur nuk ka staf të mjaftueshëm për t’u kujdesur për ta, por kjo është një çështje që nuk varet nga klinika”, theksoi ai.
Sa i përket furnizimit me materiale kirurgjikale, Dr. Kolegeci tha se gjatë këtij viti klinika nuk ka hasur probleme.
“Klinika jonë ka qenë e furnizuar me materialet e nevojshme kirurgjikale dhe nuk kemi ndier mungesë që do të ndikonte në realizimin e operacioneve”,tha ai.