Pishina e Gërmisë do të jetë përkohësisht e mbyllur me kërkesë të Inspektoratit Sanitar, deri në marrjen e mostrave dhe përfundimin e analizave nga Instituti Kombëtar i Shëndetësisë Publike të Kosovës (IKSHPK).
Lajmi është bërë i ditur nga NPL “Sport Marketing” Sh.A., e cila theksoi se rregullisht monitoron cilësinë e ujit dhe kryen matjet përkatëse në përputhje me standardet dhe procedurat e mirëmbajtjes.
Sipas njoftimit, gjendja e përgjithshme e Pishinës së Gërmisë vlerësohet e mirë, si për cilësinë e ujit ashtu edhe për kushtet e ambienteve.
Megjithatë, ndërmarrja bëri të ditur se, në respektim të procedurave të IKSHPK-së për pishinat publike dhe për hir të transparencës ndaj qytetarëve, do të presë rezultatet zyrtare të analizave para se të lejojë rifillimin e aktivitetit.
NPL “Sport Marketing” theksoi se respekton vendimet e organeve përgjegjëse dhe se prioritet mbetet siguria dhe shëndeti i qytetarëve.
Sipas njoftimit, opinioni do të informohet me kohë për rihapjen e Pishinës së Gërmisë, pas përfundimit të procedurave dhe publikimit të rezultateve zyrtare.