Pirja e mjaftueshme e ujit është thelbësore gjatë shtatzënisë, pasi organizmi ka nevojë për më shumë lëngje se zakonisht. Ekspertët rekomandojnë që gratë shtatzëna të konsumojnë 8 deri në 12 gota ujë në ditë për të parandaluar dehidratimin, një gjendje që mund të rrezikojë si shëndetin e nënës, ashtu edhe zhvillimin e fetusit.
Gjatë shtatzënisë, trupi prodhon 30–45 për qind më shumë gjak, veshkat punojnë më intensivisht, frymëmarrja përshpejtohet dhe metabolizmi rritet, duke bërë që organizmi të humbasë më shumë lëngje. Edhe djersitja më e shtuar, rritja e nevojave ushqyese dhe të përzierat me të vjella, veçanërisht në muajt e parë, e rrisin rrezikun për dehidrim, shkruan burimi Very Well Health transmeton Gazeta Shneta.
Shenjat e hershme të dehidratimit përfshijnë etjen e vazhdueshme, gojën e thatë, buzët e plasaritura, urinën me ngjyrë të verdhë të errët, urinimin më të rrallë, kapsllëkun dhe dhimbjen e kokës. Nëse gjendja përkeqësohet, mund të shfaqen lodhje, marramendje, ndjesi e mbinxehjes së trupit dhe kontraksione Braxton Hicks, të njohura si “kontraksionet e rreme” të shtatzënisë.
Në raste të rënda, dehidratimi mund të shkaktojë konfuzion, të fikët, presion të ulët të gjakut, rrahje të shpejta të zemrës, frymëmarrje të përshpejtuar, mungesë pothuajse të plotë të urinës dhe madje gjendje shoku. Këto simptoma kërkojnë trajtim urgjent mjekësor.
Dehidratimi mund të ndikojë edhe në sasinë e lëngut amniotik që rrethon fetusin. Kur ky lëng është i pamjaftueshëm, foshnja ka më pak hapësirë për t’u zhvilluar dhe mund të rritet rreziku për probleme me kordonin e kërthizës, i cili furnizon fetusin me oksigjen dhe lëndë ushqyese.
Nëse dehidratimi vazhdon për një kohë të gjatë dhe nuk trajtohet, ai lidhet me një rrezik më të lartë për lindje të parakohshme, peshë të ulët të foshnjës në lindje, zhvillim jo të plotë të trurit dhe shtyllës kurrizore, si dhe prodhim më të ulët të qumështit pas lindjes. Disa studime sugjerojnë gjithashtu se dehidratimi kronik mund të rrisë rrezikun për diabet gestacional.
Për ta parandaluar këtë gjendje, rekomandohet të konsumohen rreth 12 gota ujë në ditë. Nëse të përzierat e bëjnë të vështirë pirjen e ujit gjatë vakteve, këshillohet që lëngjet të konsumohen ndërmjet vakteve. Burime të mira hidratimi janë edhe qumështi, lëngjet natyrale të frutave, supat dhe lëngjet me elektrolite, nëse rekomandohen nga mjeku.
Rastet e lehta të dehidratimit zakonisht trajtohen në shtëpi me pushim dhe zëvendësim të lëngjeve. Megjithatë, në rastet e rënda mund të nevojitet trajtim në spital me lëngje intravenoze, sidomos tek gratë që nuk arrijnë të pinë ujë për shkak të të vjellave të vazhdueshme.
Ekspertët këshillojnë që gratë shtatzëna të kontaktojnë menjëherë mjekun nëse nuk arrijnë të mbajnë lëngje në organizëm ose nëse shfaqin shenja të dehidratimit të rëndë, pasi trajtimi i hershëm është vendimtar për shëndetin e nënës dhe foshnjës. /Gazeta Shneta/