Inteligjenca artificiale po transformon me shpejtësi sistemet shëndetësore në Evropë, duke ndihmuar në diagnostikim më të saktë, organizim më efikas të punës dhe lehtësim të ngarkesës së personelit mjekësor. Megjithatë, Organizata Botërore e Shëndetësisë për Evropën (OBSH Evropë) paralajmëron se shumica e vendeve ende nuk kanë rregulla të qarta për përdorimin e këtyre teknologjive, duke rritur rrezikun për pacientët.
Drejtori Rajonal i OBSH-së për Evropën, Hans Kluge, deklaroi se hendeku mes përdorimit të inteligjencës artificiale dhe rregullimit të saj është sfida më e madhe me të cilën përballet aktualisht sektori i shëndetësisë, shkruan Euronews transmeton Gazeta Shneta.
“Sa më gjatë të vazhdojë ky hendek, aq më të mëdha do të jenë pasojat për njerëzit”, paralajmëroi ai gjatë një konference për media të mbajtur më 15 korrik në Lisbonë.
Sipas Kluge, një algoritëm i njëanshëm ose i pasaktë mund të çojë në diagnoza të gabuara, me pasoja reale për pacientët.
Të dhënat e OBSH-së tregojnë se rreth dy të tretat e 53 vendeve të rajonit evropian tashmë përdorin sisteme të inteligjencës artificiale për diagnostikim, ndërsa gjysma e tyre kanë vendosur chatbotë të bazuar në AI për komunikimin me pacientët.
Megjithatë, vetëm një në 12 vende ka zhvilluar strategji të posaçme për mënyrën se si duhet të rregullohet dhe mbikëqyret përdorimi i inteligjencës artificiale në shëndetësi.
Raporti tregon gjithashtu se vetëm 8 për qind e vendeve kanë një strategji kombëtare të dedikuar për përdorimin e AI-së në sektorin e shëndetësisë, ndërsa pothuajse 40 për qind nuk kanë udhëzime etike për përdorimin e saj në institucionet shëndetësore.
Edhe përgatitja e profesionistëve mbetet e kufizuar. Vetëm një në pesë vende ofron edukim për inteligjencën artificiale për studentët e shkencave mjekësore, ndërsa vetëm një në katër organizon trajnime për punonjësit shëndetësorë që tashmë janë pjesë e sistemit.
Kluge e cilësoi këtë situatë si shqetësuese, duke theksuar se mungesa e rregullave dhe e përgatitjes profesionale mund të ndikojë drejtpërdrejt në sigurinë e pacientëve dhe të dëmtojë besimin e qytetarëve ndaj sistemeve shëndetësore.
Për të adresuar këto sfida, OBSH synon që në vitin 2028 të publikojë një Udhërrëfyes për Inteligjencën Artificiale dhe Shëndetin, i cili do të ofrojë orientime për përdorimin e sigurt, etik dhe efektiv të kësaj teknologjie në kujdesin shëndetësor. /Gazeta Shneta/