Koalicioni PDK-AAK-Nisma ka nënshkruar memorandumin e mirëkuptimit me Federatën e Sindikatave të Shëndetësisë në Kosovë (FSShK).
Me këtë memorandum parashihet që shëndetësia do të jetë prioritet, rritja e buxhetit dhe rritja e pagave dhe furnizimi me barna, raporton Ekonomia Online.
Kryetari i PDK-së, Kadri Veseli tha se kjo ditë është ditë e veçantë.
“Me një lidership të aftë për të vepruar dhe për të arritur vizion. Shëndetësia është sektor i veçantë dhe rritja e pagave dhe zotimi që e kemi për shërbime shëndetësore ka për qëllim që qytetarët të kenë jetë më të sigurt dhe shërbime më cilësore. Ne, koalicioni fitues për Fillimin e Ri dhe Sindikata zotohemi se do të kemi bashkëpunim dhe zotohemi se ky do të përmbushet”, ka thënë Veseli.
Sipas tij, ky memorandum nuk do të jetë i vetmi.
Kandidati për kryeministër nga koalicioni PAN, Ramush Haradinaj ka thënë se punëtorët mjekësorë e deri te teknikët janë heronjtë tonë shëndetësorë.
“Jemi tri palë, por jemi një”, ka thënë Haradinaj.
Kryetari i Federatës së Sindikatave të Shëndetësisë në Kosovë, Blerim Syla tha se fokusi i të gjithëve do të jetë pacienti.