Zyra Kombëtare e Auditimit ka publikuar raportin për SHSKUK-në për vitin e kaluar.
ZKA ka gjetur parregullsi në disa fusha të menaxhimit financiar dhe qeverisjes në SHSKUK. Dobësi theksohen në klasifikimin e shpenzimeve, vlerësimin e pasurisë, pagesa të parregullta dhe menaxhim jo efikas i barnave, shkruan Gazeta Shneta.
Parregullsitë që Auditori i ka gjetur në Prokurimin e QKUK-së, kanë të bëjnë me mangësi të planifikimit.
ZKA ka gjetur se plani i prokurimit i hartuar nga QKUK nuk i përmbante të gjitha aktivitetet që janë zhvilluar gjatë vitit 2016.
“Dy kontrata për servisim të pajisjeve laboratorike në vlerë 102,300€, si dhe një kontratë për servisim të pajisjeve të anestezionit në vlerë 455,895€ nuk ishin përfshirë në planin e prokurimit të QKUK-së. Përveç kësaj, mirëmbajtja dhe servisimi i pajisjeve mjekësore nuk ishte përfshirë fare në këtë plan, derisa në raportin e kontratave të nënshkruara kishte dhjetë 10 kontrata të tilla të nënshkruara gjatë vitit 2016”, thuhet në raport.
Tutje shtohet se ky plan poashtu nuk ofronte informata rreth periudhës së përafërt të zhvillimit të procedurave të prokurimit.
“Plani jo i plotë i prokurimit dhe mungesa e specifikimit të afateve për realizimin e procedurave mund të rezultojë në kontrata të pa planifikuara, vonesa në inicimin e procedurave të prokurimit dhe mosrealizim të buxhetit”, theksohet në raport.
ZKA rekomandon Bordin drejtues dhe Drejtorin e Përgjithshëm i ShSKUK-së që duhet të sigurojnë që planifikimi i aktiviteteve të prokurimit të QKUK-të përfshijë të gjitha kërkesat për mallra dhe shërbime si dhe investime kapitale, me detajet e kërkuara, si dhe të specifikohen afatet e përafërta kohore për zhvillimin e procedurave të tyre.
Kujtojmë se zyrat e Prokurimit u thyen nga persona ende të panjohur në fillim të muajit prill.
Policia pati intervistuar shtatë persona në lidhje me këtë rast, por deri më tani nuk ka ndonjë të dyshuar.
Zyrtarët e QKUK-së patën deklaruar se në zyrat e prokurimit nuk mungon asgjë. /Gazeta Shneta/