Pas raportimit në media për vdekjet e dyshimta në Qendrën Klinike Universitare të Kosovës ka reaguar edhe drejtori ekzekutiv i Organizatës për Arsim, Shkencë dhe Shëndetësi “KISCOMS”, Xheladin Ujkani.
Me anë të një postimi në rrjetin social, ai ka kërkuar që të bëhet një hetim i jashtëm për këto vdekje. Sipas tij, në rrethana të tilla nuk mjafton vetëm raporti i komisioneve të brendshme të formuara nga drejtori i QKUK-së, Curr Gjocaj.
Ujkani me ketë rast e ka dhënë edhe shpjegimin pse duhet të bëhet hetimi i jashtëm.
“E para, për shkakun që bëhet fjalë për raste jo të zakonshme të cilat janë shqetësuese edhe për mua në radhë të parë si qytetar, si pacient, por edhe si profesionist. E dyta, hetimi i jashtëm gjithesesi e ka besueshmerinë më të madhe si nga qytetarët, si nga pacientët, po ashtu edhe nga profesionistët shëndetësorë dhe vet stafi i QKU-së”, ka shkruar Ujkani, transmeton Aktivpress.
Hetimin, siç ka thënë ai, duhet ta kerkojnë institucionet, vet Klinikat e Kirurgjisë dhe drejtori Gjocaj.
Ai e ka përmbyllur statusin e tij në Facebook, duke thënë se nuk beson se bëhet fjalë për lëshime profesionale nga ana e mjekëve.
RTK ka raportuar se në Klinikën e Kirurgjisë, vetëm brenda një dite kanë vdekur katër persona; njëri prej tyre fëmijë.
Ngjarja thuhet të ketë ndodhur javën që shkoi por e tëra ka kaluar në heshtje derisa nuk u bë publike nga mediat.
Sot, sipas mediumit publik, është mbajtur një takim urgjent ku drejtori i Shërbimit Spitalor, Curr Gjocaj, ka thirrur në takim udhëheqësit e klinikave dhe është marrë vendim të krijohen komisione për të mësuar shkaqet e vdekjes së pacientëve.